Өткен жылдың тамыз айында «Атлетик» спорт кешенінің базасында оңалту орталығы іске қосылды. Бүгінгі таңда мұнда коронавируспен ауырған науқастар емделуде. Дегенмен де алдағы уақытта аталған орталық кеңейтіліп, мүгедектігі бар адамдарды оңалтумен де айналысады деген жоспар бар. Мәселен, «Айқын МСБ» жауапкершілігі шектеулі серіктестігінің демеушілігімен кешен құрылысына 57 млн теңге жұмсалған. Оған ешқандай бюджет қаржысы шығындалмаған. Бірақ бұл мақсатқа облыс әкімдігінің тарапынан 0,9 гектар жер бөлінген. Орталықтағы нысандардың жалпы ауданы 900 шаршы метрден асады. Кешен мүмкіндігі шектеулі жандардың қоғамға бейімделуіне, оларды кәсіпке баулып, өздерінің физикалық мүмкіндіктеріне сәйкес табыс табуға ықпал етуге баулып келеді. Орталықта бір мезетте 60 адамға дейін оқып, жұмыс істей алады. Кешен негізгі және бизнес-инкубатордан, яғни шеберханалардан тұрады. Оның біріншісінде 30 бөлме болса, бизнес-инкубаторда тағы 8 бөлме бар. Мүгедектігі бар адамдар үшін жеті тігін, үш токарлық, фрезерлік және лазерлік станоктар, сондай-ақ ұсақтағыш қондырғылар орнатылған. Орталықта өз бетінше қозғалып немесе отырып жұмыспен айналыса алатын келушілер жұмысқа орналасу немесе өз жұмысын бастау үшін жаңа кәсіптерді игеретін болады. Барлық бөлме қажетті жиһаздармен жабдықталған. Ал спортпен шұғылдануға ниетті жандар үшін велотренажер, теннис үстелі және жүгіру жолақтары да қамтылған. «Орталық ел Тәуелсіздігінің 30 жылдығына орай ашылып отыр. Әлеуметтік салада мемлекеттік қолдаудың жыл сайын артып келе жатқаны белгілі. Соңғы жылдардағы қиын жағдайларға, әлемдік экономикалық дағдарысқа және коронавирустық пандемияға қарамастан, бірде-бір әлеуметтік пакеттің қысқаруына жол берілген жоқ. Керісінше, қолдау шаралары артты», дейді «Асар» заңды тұлғалар бірлестігінің төрағасы Руслан Төлегенов.
Ал Сивара Нурматованың айтуынша, инватакси диспетчерлік қызметі кеңсесінде өткен жылдың өзінде 17 мыңнан астам көліктік қызмет көрсетілген екен. Сонымен қатар «Мүгедектердің жастар қоғамы» қоғамдық бірлестігінің төрағасы Әйгерім Дәулетбаева мұнда балаларды жалпы білім беретін мектепте оқытуға дайындайтынын, психологиялық қызмет, күндізгі стационар палаталары, массаж, дәрігерлік қабылдау және ем-дом, электрофорез кабинеттері жұмыс істейтінін айтты. Сондай-ақ бизнес-инкубаторда ересектер ағаш ою, тігін, токарлық жұмыстармен де айналыса алады. Ал бүгінде іргедегі 2,6 мың шаршы метр жерге иппотерапия орталығының құрылысы басталуда. Орталықтың ашылу салтанатына қатысқан кезде де Жамбыл облысының әкімі Бердібек Сапарбаев өңірдің әр аудан орталығы мен қалаларында мүмкіндігі шектеулі балалар мен ересектерге арналған оңалту орталықтарын ашу міндеті тұрғанын айтқан еді. Енді мұндай мекеме биыл Талас ауданының орталығы Қаратау қаласында да ашылатын болады.
Жамбыл облысы
