Пікір • 27 Сәуір, 2021

Татулықтан асқан байлық жоқ

413 рет
көрсетілді
6 мин
оқу үшін

Биыл тарих парақтарына алтын әріппен жазылған Тәуелсіздіктің 30 жыл­дығы. Осынау жылдар ішінде жас Қазақстанымыз жан-жағына үздік үлгі көрсетіп, жасампаз елге айналып үлгерді. Айтар ауызға жеңіл болғанымен, бұл жетістіктердің астарында үлкен еңбек, келелі келісімдер, сындарлы стратегия жатыр.

Татулықтан асқан байлық жоқ

Ең алдымен егемен еліміздің тату-тәтті, бейбіт жағдайда өмір сүріп келе жатқаны – Елбасы Нұрсұлтан Назар­баевтың сарабдал саясатының арқасы. Көреген көшбасшы ХХІ ғасыр­дағы Қазақ­станды талантты, еңбекқор, толе­­рантты тұлғалармен тұтастырып, ба­қыт­ты қоғам құруға бар қажыр-қай­ратын жұмсады. Бұл – шын мәнінде бәріміздің мақтан тұтатын ортақ жемісіміз.

Қазақстан бүгінде көптеген этнос пен конфессия өкілдерінің туған үйіне айналып отыр. Тәуелсіздіктің алғаш­қы жылдарындағы еліміздегі ауыр жағ­дайды бастан кешіре отырып, 1992 жылы Елбасының айтқан идеясының негізінде Қазақстан халқы Ассамблеясы атты жаңа институт өмірге келді. Содан бері ұлттық саясаттың ар­қау­лық қағидаты – Қазақстандағы ба­р­­лық этностар мен конфессиялардың тең құ­қық­тарының сақталуы қағидаты еш­қа­шан да назардан тыс қалған емес. Біз қо­ғамдық тұрақтылықты, этнос­ара­лық келісімді қамтамасыз етуде, қазақ­стан­дық біртұтастық пен жаңа қазақ­стан­дық патриотизмді қалып­тастыруда өз моделімізді жүзеге асырып келеміз.

Ассамблея идеясын санасына сіңір­ген, қиын-қыстау тарихи кезеңдер­ден бірге өткен аға буын үшін келісім мен бірлік – өмір негізі. Ендігі жерде бұл ұғымдардың қасиетін өскелең ұрпақ­қа, еліміздің келешек иелеріне түсін­діру, бойларына дарыту – алдымызда тұр­ған міндет. Жоғары оқу орындарында «Қазақстан халқы Ассамблея­сы» кафедраларының ашылғанды­ғы осы бағыттағы жұмыстың дұрысты­ғын көрсетеді. Сонымен қатар бар­лық этно­мәдени бірлестіктердің жаны­нан «Аналар кеңесі» құрылып, ұлт­тың тәрбиесіне баса мән беріліп отыр. Ел­ба­­сының тапсырмасымен қоғам­дық келісім комиссиялары үлкен ұжым­дар­да, қалалық, аудандық, ауылдық округ­терде құрылып, жергілікті аза­мат­тардың жауапкершілігін арттыруда. Елбасының ақыл-ойының тереңдігі мен саяси алғырлығынан туындаған инс­титут ретінде Ассамблея Қазақстанның тәуелсіздігін нығайтуға белсенді қыз­мет етіп келеді.

Бүгінгі таңда Қазақстан халқы Ассам­б­леясының мәртебесі мен өкілет­тігі өсті. Біздің көпэтносты еліміздің барлық халқының мүдделерін көздей отырып, Ассамблеядан сайланған депутаттар Қазақстандағы этносаралық бітім мен келісімді нығайту үдерісіне өз үлестерін қосуда және «Мәңгілік ел», «Рухани жаңғыру» идеяларын жүзе­ге асыруға айрықша мән беруде. «Мәң­­гі­лік ел» идеясының өмірлік шын­дық­­қа айналуы үшін барша қазақстандық­­тың бойына азаматтық патриоттық сезім ұялатуда Ассамблеяның атқаратын қыз­­меті ұшан-теңіз. Халық бірлігін сақтап, достығын дәнекерлеуде алатын орны ерекше. Ассамблея көптеген дәстүр мен мәдениетті бір арнада тоғыстырған біздің ортақ үйімізге айналды. Тәуелсіздікпен бірге жасап келе жатқан, әлемге Нұрсұлтан Назар­баевтың қоғамдық келісім үлгісі ретінде танылған Ассамблеяға игілікті істер, баянды бастамалар тілейміз. Қазақ халқының айналасына жұдырықтай жұмылған Қазақ елінде тұратын барша азамат еліміздің келісті келісімін, жарасымды бірлігін көзінің қарашығындай сақтап, алда тұрған ұлы мақсаттарға бірлесе бет алуда.

Мемлекет басшысы Қасым-Жомарт Тоқаев Елбасы негізін қалаған келелі істі кемеліне жеткізуге айрықша мән беріп отыр. Халық ынтымағын нығайтып, ел бірлігін сақтау мемлекеттік дәрежедегі маңызды тетік болып қала береді. Біз – үлкен бір отбасының мүшелеріміз. Тәуелсіздік алған 30 жылдың ішінде татулығымызға сызат түсірмей, қандай сын сағатта да бірлігімізден ажырамай келе жатырмыз. Соның арқасында ішкі, сыртқы саясаты мығым мемлекет құра білдік. Әлем өзгеріп жатыр, жаңа заман біздің дамып келе жатқан жас мемлекетімізден жаңа қадамдар, батыл шешімдер талап етеді.

Қазақстан қашаннан да халықтар достығының алтын бесігі саналады. Айрандай ұйыған татулық пен бірліктің, ынтымақ пен берекенің ұйытқысы бола білді. Қазақ халқы – өзінің даласының кеңдігіндей, бабасының өрлігіндей дархан халық. Тағдырдың түрлі сынағын бастан кешкен халықтар жан-жақтан ағылып келгенде, бауырмалдық танытып, барша жұрттың баласына құшағын кең ашты. Олар қазақ даласында өсіп-өркендеп, кеңге қанат жайды. Сан тарау тағдырлар көктемде бүр жарған гүлдей осы құтты даладан бақыт тапты. Қасиетті қазақ жазирасын мекендеген барша қандастарымның арманы, бәріміздің ортақ мақсатымыз – Қазақстанымыздың гүлденуі, болашақ ұрпақтарымыздың жарқын өмірі.

Сөз басында айтып өткенімдей, өмір ағысы мүлде басқа арнаға бұрылды. Жаһандық сын-қатерлер адам баласын тығырыққа тіреп, өмір сүруді қиындат­ты. Мұның бәрін жеңетін қуатты күш – татулық пен бірлік. Ең бастысы, осы құндылықты біздің мем­лекетіміз барынша сақтап, аялап отыр. Әр істің байламын тереңнен тарқататын қазақ елі: «Бетеге кетсе бел қалар, бірлігің кетсе нең қалар?» деген сөзді жайдан-жай айтпағаны анық. Зерделеп қараған жанға береке бірліктен, тату тірліктен асқан байлық жоқ.

Тарих беттеріне зер салсақ, басына қысылтаяң күн туғанда тарыдай бытырап келгендерді қонақжайлықпен қарсы алуы қазақ жұртының жүрегінің дариядай кеңдігін аңғартса керек. Олар осы жақсылықтың барлығын алғыс алу үшін емес, адамдар арасындағы ізгілік пен жанашырлықтың керуені тоқтамасын деп жасады. Ендеше, «Адамзаттың бәрін сүй, бауырым деп» дейтін хакім Абай сөзі­нен терең тамыр алған әр қазақ­стан­д­ық обал мен сауаптың, жақсы мен жаман­ның парқын бір кісідей біледі. Өзі­міз бақытты ғұмыр кешіп отырған тәуел­сіз еліміздің болашағы жарқын болсын!

 

Князь МИРЗОЕВ,

Қазақстан күрдтері «Барбанг» қауымдастығының төрағасы, академик