«Қазақстанның 100 жаңа есімі» жобасында ортасынан оза шауып, ерен шыққандардың легі көп болды. Солардың қатарында «Қоғам» санатында Қазақстан Қарулы күштерінің тұңғыш әскери ұшқыш-истребителі Ардана Ботай ерекше көзге түсті. Себебі Ардана балауса шағынан бастап әскери ұшқыш болуды армандаған. Бүгінде ару қызымыз авиациялық эскадрильядағы жойғыштың аға ұшқышы болып қызмет атқарады. Сондай-ақ ол «Су-30СМ» жаңа буын жойғышымен әуеге көтеріліп, ұшып жүр.
Ал жобадағы «Ғылым мен инновация» санатында топ жарған жас инженер Санжар Тайжан Англияда жер-жаһанға әйгілі Jaguar және Mclaren сияқты алпауыт компаниялармен жұмыс істеді. Ол конкурсқа қатысқан 30 студенттен тұратын команданы құрып, миллиардер Илон Масктың Not-A-Boring Competition байқауының финалына өткен еді. Енді жас буын Илон Mask-тың компаниясында өміршеңдегін көрсетіп келе жатқан үш жобаны қолға алған.
