Аймақтар • 06 Мамыр, 2021

Қайтпас 1 қараңғылық құшағында

53 рет көрсетілді

Шымкент қаласы әкімдігі ғимараты орналасқан аумақтан 3-4 шақырым қашықтықтағы «Қайтпас 1» шағын ауданы қас қарайса болды, қараңғылық құшағында қалып тұр.

Тіпті жауын-шашын, қатты жел тұрған күндері жарық жиі сөнеді. Электр желілері ес­­кір­ген. Ол аздай аудандағы Ал­тай, Са­­рыжайлау, Ақжелкен, Бо­ла­шақ көшелерінде көше шам­дары атымен жоқ. Соның салдарынан аталған ауданда ұрлық-қарлық, тонаушылық тыйылмауда. Былтыр ұйымдасқан қылмыстық топ бір тәулік ішін­де осы аудандағы Жа­мауов, Ақ­баев, Ақжелкен көше­леріндегі жеке тұрғын үйлерді тонап, тұрғындардың дүние-мүлкіне зиян келтірген.

«Көше шамдарының жоқ­тығынан жол бойындағы дүкен алдында маскүнемдердің де қа­расы көбейе түскен. Кішкентай балаларымызды дүкенге не сырт­қа шығаруға қорқатын болдық», дейді аудан тұрғыны Айымгүл апа.

Иә, шынымен де аталған аудан мегаполис әкімдігі ор­наласқан Нұрсәт шағын ауданына тиіп тұрғанымен мұн­дағы инфрақұрылым мен ком­муналдық қызмет сапасы сын көтермейді. Тұрғындардың сө­зіне сүйенсек, аудандағы қо­ғамдық көлік қызметінің сапасы да өте төмен. Таңғы және кеш­кі уақыттарда ескі қытай авто­бустарының қатынау жиілігі 30-40 минут, тіпті сағатқа созылады екен. Жұмысынан кешігіп қалмауға тырысқан жұртшылық көбіне такси қызметіне жүгінуге мәжбүр.

Аудан тұрғындары арыз-ша­ғымын жергілікті аудан әкім­дігіне жеткізген. Алайда әлі  нақ­ты шешім жоқ.

Былтыр сәуір айында шаһар басшысы Мұрат Әйтенов Қайт­пас 1 шағын ауданын аралау ба­рысында тұрғындар сапасы төмен жекеменшік жарық жүйе­сіне шағымданған еді. Бұдан бөлек қайтпастықтар жол, ауыз су, газ, қоғамдық көлік мәселесі де өзекті екенін айтқан. Өз кезе­гінде Мұрат Дүйсенбекұлы тұр­ғындар көтерген мәселелер кезең-кезеңімен шешілетінін жеткізген.

«Сіздердің қуаты әлсіз жеке­меншік электр энергиясын тұ­тынып отырғандарыңыздан хабардармын. Кезінде осындағы 416 үйге жарық жүйесі жетпей қалған екен. Соны ескеріп, қуат жүйесін жүргізуге байқау өткізіп, мердігер мекемені анықтадық. Жуырда олар жұмысын бастайды. Құрылыс жұмыстарын күзге дейін бітіруге әрекет жасаймыз. Сонда сіздерде сапалы энер­гия болады. Ал су, газ тарту мә­се­ле­сіне келсек, жуырда жоба­лық-сметасын жасаймыз. Биыл жұмыстарды бастауға тырысамыз», деген еді қала әкімі.              

Алайда жыл өтсе де аудан­дағы жарықтандыру жұмыстары жабулы қазан күйінде қалып отыр. Амалы таусылған тұр­ғындар өз үйлерінің тұсына өз күш­терімен жарық шамдар ор­натуға көшкен...

 

ШЫМКЕНТ

 

Соңғы жаңалықтар

Есентай өзені суала бастады

Экология • Бүгін, 00:11

«Сары» түтіннің салдары

Экология • Бүгін, 00:04

Эйнштейнмен ерегісу

Руханият • Кеше

Ұқсас жаңалықтар