Жер қатынастары саласына байланысты мәселелер бойынша өңір тұрғындарына қолдау көрсетуді көздейтін тың жоба облыстық жер пайдалануды және қорғауды бақылау басқармасы мен «Қостанай – адалдық алаңы» жобалық кеңсесінің бастамасымен қолға алынып отыр.
Жоба жетекшілерінің сөзінше, фронт-кеңсе мамандары өздеріне жүгінген кез келген азаматтың жер кезегіне тіркелуін, жер құжаттарын заңдастыруды ұйымдастырады және құқықтық тұрғыдан ақыл-кеңес береді.
«Мемлекеттік мекеме мен азаматтардың арасындағы байланысты жеңілдету бағытында біз осындай жұмыс форматын қарастырып отырмыз. Мұнда білікті мамандар халыққа ашық және қолжетімді түрде көмек көрсететін болады. Фронт-офис жердің пайдаланылуы мен қорғалуын бақылау басқармасына келіп түскен өтініштер бойынша жұмыс жүргізеді. Кеңсе жұмысы азаматтардың өтініштері мен талаптарын жан-жақты зерделеуге, барынша ашықтыққа және тұрғындарға қолайлы жағдай жасауға бағытталған», деді «Қостанай – адалдық алаңы» жобалық кеңсесінің жетекшісі Анжела Әлжанова.
Былтыр өңірдің барлық қалалары мен аудан орталықтарында дәл осындай фронт-кеңселер ашылғанын айта кеткен жөн. Бұл кеңселер тұрғындар тарапынан жиі сұранысқа ие әлеуметтік маңызы бар мәселелер бойынша тегін қызмет көрсетеді.
