Ұлы Жеңістің 65 жылдығы қарсаңында бүгінде құжаттар мен жаңа тарих орталығы деп аталатын қалалық мұрағаттан сұрапыл соғыс жылдарынан сыр шертетін түрлі деректер оқтын-оқтын табылып қалып жатыр.Айталық, бір дерек семейлік Кенжебек Шәкенов Днепрден өткендегі көзсіз ерлігі үшін Кеңес Одағының Батыры атағын 1944 жылы кеңес әскерінің күні қарсаңында алғандығын айғақтайды. Ал екінші бір дерек келер жылғы дәп осындай мереке күні семейлік жерлестерін тағы бір Кеңес Одағының Батыры Василий Шулятниковтың құттықтағаны жөнінде сыр шертеді.
Тәуелсіз еліміз егемендікке қол жеткізгеннен бергі жерде бізде Отан қорғаушылар күні басқа күнге ауыстырылғаны баршамызға мәлім. Солай дей тұрғанмен, тарихтың аты тарих. Сондықтан өткенді де біржолата сызып тастауға болмайды.
Енді жоғарыда аталған орталықтан табылған мына бір дерекке көңіл аударайық. Майдангер Насыр Кенбаев 1943 жылы елдегі қалыңдығы Әтина Қасымбековаға кезекті бір хатын жолдамай ма. Өкінішке қарай, ол хат иесінің қолына тимей жоғалып кетеді. Бұл екі аралықта майдангер соғыстан аман-есен оралып, сүйген жарына қосылады. Содан арада ұзақ ондаған жылдар өткен соң Ұлы Отан соғысы туралы теледидардан хабар көріп отырған Насыр ақсақал өзінің қолымен жазылған әлгі хатты көріп қалады. Осыған дейін де, содан кейін де талай көрмеге қойылған хаттың түп нұсқасы ақыры хат иелерінің қолына тиеді.
Бүгінгі күні жастары тоқсанға жақындап қалған Насыр ақсақал мен Әтина әже балалар, немере- шөберелерімен, ағайын-туыстарымен бірге Жеңістің 65 жылдығын қарсы алуға қамданып отыр.
Дәулет СЕЙСЕНҰЛЫ,Семей.