Орман шаруашылығы және жануарлар әлемі комитеті рұқсат берген фототүсірілімге қатысты пікірде халықтың азаматтық позициясының артып, қоршаған ортадағы жағдайларға бейжай қарамайтын азаматтардың көптігі сөз болды.
«Оспан Әлінің киікті қорғаймын деп құрбан болған Ерлан Нұрғалиевтің құралаймен түскен әйгілі фотосының авторы екенін білесіздер. Туынды киіктерді қорғаудың символына айналып кетті десе де болады.
Ал соңғы түсірген суреттерінің мақсаты - сұлу табиғатымызды көрсетіп, насихаттау, адамдардың сұлу жануарға махаббатын ояту арқылы қорғауға атсалысуға итермелеу еді», дейді Самал Ибраева.
Сондай-ақ жай ғана қызығушылық танытып, құралаймен суретке түсе беруге болмайтынын жеткізді.
«Төлдеу уақытының маңыздылығын ескере отырып, мен салаға жаны ашитын, бейжай қарамайтын адам ретінде төлдеу маусымында видео-фототүсірілімдерге мүлдем тыйым салатын арнайы құжат әзірлеуге басшылылққа өтініш беруге шешім қабылдадым. Себебі, дәл қазіргі уақытта ондай нақты регламент жоқ екен. Бұл шараны Орман шаруашылығы және жануарлар әлемі комитетімен талқылайтын боламыз», деді ол.
Айта кетейік, осы аптада әлеуметтік желіде құралаймен фотоға түскен интернет қолданушылары қалың жұртшылықтың сынына қалған болатын.
