ҰРПАҚТАР САБАҚТАСТЫҒЫ ҮЗІЛМЕУІ ТИІС

Елордадағы Қазақ гуманитарлық заң университетінде Қазақстан Жастар конгресі мен Қазақстан халқы Ассамблеясы бірлесіп қолға алған “Жастар – Қазақстан халқы бірлігі үшін” деген тақырыпта жалпыұлттық форум өз жұмысын бастады. Білім және ғылым министр­лігінің қолдауымен ұйымдастырыл­ған бұл шараның негізгі өзегі – жастардың бойына рухани-адам­гершілік құндылықтарды мықтап сіңіру арқылы патриотизмді ны­ғайту. Кеше, яғни форумның алғашқы күні “Ұрпақтар сабақ­тастығы” деген атпен жастардың еліміздің белді саясат және мәде­ниет қайраткерлерімен, зиялы қауым өкілдерімен кездесуі өтті. Кездесуге көрнекті ақын, қоғам қайраткері Мұхтар Шаханов, Пар­ламент Сенаты мен Мәжілісінің депутаттары Ғарифолла Есім мен Бекболат Тілеухан, Ұлттық ғарыш агенттігі төрағасының орынбасары Мейірбек Молдабеков, профессор Рүстем Омаров қатысты. Басқосу кезінде ұрпақтар сабақтастығын сақтау, рухани-адамгершілік құндылықтар, білім, өмірлік философия, қазақ халқының мәдени, тілдік ерекшеліктері төңі­регінде пікір алмасылды. Мәселен, Ғарифолла Есім ұрпақтар сабақтас­тығы деген мәселенің айрықшы маңызға ие екендігіне тоқталды. “Біз – 20 ғасырдың адамдарымыз. Сол ғасырда өсіп, сол ғасырда тәрбиеленіп шықтық. Ал сендер 21 ғасырдың ұрпағысыңдар. Біз сендерге өз ғасырымыздың терезе­сі­нен қарап тұрмыз. Сондықтан, елі­міздің, оның болашағының қан­дай болмағы, қандай арнаға түсетіні сендердің қолдарыңда. Бұл жерде ұрпақтар сабақтастығы деген де үлкен рөл атқарады. Егер, ұрпақтар сабақтастығы үзілсе, біз мүлде басқа арнаға кетіп қаламыз”, деген ойын жеткізді Сенат депутаты. Бұл күні форумға қатысушылар “Құрылтай алаңы” деп аталған сұхбат алаңдарында да халықтың келешегімен біте қайнасатын күрделі мәселелер төңірегіндегі ойларымен бөлісуге мүмкіндік алды. Ләйла ЕДІЛҚЫЗЫ.