ЗАҢДЫЛЫҚТЫ САҚТАУ ТҰРҒЫСЫНДАҒЫ МІНДЕТТЕР

Президент Әкімшілігі Басшы­сы­ның орынбасары Талғат До­нақов­тың төрағалық етуімен кеңес өткізіліп, оның жұмысына Бас прокурор Қ.Мәми, Жоғарғы Сот Төрағасы М. Әлімбеков және құқық қорғау органдарының бірін­ші басшылары қатысты. Кеңесте заңдылықты қамтама­сыз ету, қылмысқа және сыбайлас жемқорлыққа қарсы күрес мәсе­лелері қаралды, сондай-ақ құқық қорғау органдарының 2010 жылғы І-тоқсандағы жұмысының қоры­тын­дысы жасалды. Т.Донақов өзінің сөзінде мем­ле­кеттік басқару институттары жүйесінде құқық қорғау орган­дарының маңызды рөл ойнайты­нын, себебі азаматтардың әлеу­меттік әл-ауқаты елеулі мөлшерде заңдылық пен құқық тәртібінің дең­гейіне байланысты екенін атап көрсетті. Осыған байланысты Президент Н.Ә. Назарбаевтың халыққа Жолдауында айтылған тапсырмаларының мүлтіксіз орын­далуы қажеттілігіне назар ауда­рылды. Азаматтардың құқықтарын қорғау және заңдылықты сақтау басымдығы құқық қорғау орган­дары жұмысының негізгі прин­ципі болуы қажет. Кеңесте Ішкі істер ми­нистрі­нің, Экономикалық қыл­мыс­қа және сыбайлас жемқорлыққа қарсы күрес агенттігі төрағасының, Кедендік бақылау және Қылмыс­тық-атқару жүйесі комитеттері төрағаларының баяндамалары тыңдалды. Мәселелерді талқылау нәтиже­лері бойынша заңдылықты және құқық тәртібін нығайту, оның ішінде көшелерде және өзге қо­ғам­дық орындарда тәртіп орнату, көші-қон бақылауын күшейту, ұйым­дасқан және трансұлттық ұйым­дасқан қылмысқа қарсы кү­рес, қару-жарақтың айналымын бақы­лау, кеден және экономи­калық қызмет саласында қылмыс­тардың алдын алу шараларын қолдану және оларды уақтылы ашу бойынша міндеттер белгіленді. “Егемен-ақпарат”.