Осы орайда Жәйрем кентінің «Өндіріс еріктілері» деп аталатын еріктілер тобы игі іске бастамашы болып, Қарағанды облыстық онкологиялық диспансерінің пациенттеріне арнап 200 литр қымыз жеткізді.
«Өндіріс еріктілері» тобының жетекшісі Гауһар Наурызбаева онкологиялық науқастарды қымызбен қамтамасыз ету идеясын ұйым мүшелерінің бірі ұсынғанын айтады. Сөйтсе идея авторы осы ауруханаға түскен екен. Содан диагнозы расталмаған соң, қуанышы қойнына сыймай, осы игі істі жүзеге асыру туралы ойын ортаға салыпты.
– Ай сайын ауылдың әлеуметтік тұрғыда аз қамтылған тұрғындарына көмектесіп тұрамыз. Жұмысымыз екі бағытта жүреді. Бұл материалдық қолдау – біз өнімдерді, қажетті заттарды ақша жинап, сатып аламыз. Сонымен қатар сенбілікке шығамыз, шарбақтарды сырлауға, ағаштарды әктеуге көмектесеміз. Бастапқыда біз Жәйрем тұрғындарына ғана көмектесеміз деп ойлағанбыз. Уақыт өте келе Қаражал мен Өскемендегі аз қамтылған отбасыларға көмектесу мүмкіндігі туды. Енді облыс тұрғындарына да қол ұшын созып жатқан жайымыз бар, – дейді Г.Наурызбаева.
Жәйрем кентінде негізі қаланған «Өндіріс еріктілері» тобының құрамына «Қазцинк» компаниясында жұмыс істейтін 150 ерікті кіреді. Бұлардың барлығы да жерлестерінің идеясын бір кісідей қолдап, қымызға қажетті қаражатты тез арада жинап берген. Соның нәтижесінде диспансерде ем алып жатқан 180-ге таяу науқас бал қымыздың дәмін татып, бойларына шипа дарытты.
Аталған диспансердің бас дәрігері Мұратбек Жұмақаев жәйремдік жаны ізгі азаматтардың бұл қайырымды ісін жоғары бағалап, зор алғысын жеткізді.
– Бие сүті химиялық және сәулелік терапия алатын пациенттердің сауығуына үлкен көмегін тигізеді. Бір ғана ескертетін жайт бар, қымызды операциядан кейін бірден ішуге болмайды, – дейді М.Жұмақаев.
«Өндіріс еріктілері» тобы қайырымдылық істерін әрі қарай да жалғастыра бермек. Мысалы, олар алда келе жатқан 1 маусым – Балаларды қорғау күні мерекесіне тыңғылықты дайындалу үстінде. Еріктілер Жәйрем кентіндегі мүгедек балаларға арнап мерекелік сыйлықтар тарту етпек.
