Қостанай, Железорудный, Құсмұрын, Аманқарағай, Қойбағар, Тобыл, Лисаков темір жол бекеттері вокзал шаруашылықтарының атынан сөйлеген Гүлнар Райымбекова:
– Қостанай облысында жолаушылар тоқтаусыз ағылып жатқан, келімді-кетімді адамға жиі толып кететін вокзалдар көп. Бізде жолаушылардың денсаулығын тап басып анықтай алатын мүмкіндік жоқ. Сондықтан жан-жақтан ағылып жатқан адамдар жол тоқайластыратын темір жол вокзалдары Ashyq жобасына ең алдымен қатысуы тиіс деп ойлаймыз. Алайда бас санитарлық дәрігердің соңғы қаулысында темір жол вокзалдары туралы ештеңе айтылмаған. Қазір не істерімізді білмей отырмыз, – деді.
Облыстық кәсіпкерлер палатасының директоры Мұрат Әбеновтің сөзінше, дәл қазір Ashyq жобасына қатысудың екі-ақ жолы бар екен.
– Егер сіздер Ashyqqа дайын болсаңыздар, біз өз тарапымыздан жобаны енгізуге және алгоритмін түзуге көмек бере аламыз. Бұл жобаға ерікті түрде қатысқысы келдетіндерге қатысты. Ал Ashyqqа Үкімет жанынан жұмыс істеп жатқан салааралық комиссияның келісімімен қатысу жөніне келетін болсақ, онда сіздер Ashyqty Қостанай облысындағы темір жол вокзалдарына қанатқақты жоба ретінде енгізу туралы ұсыныс бере аласыздар, – деді М.Әбенов.
Темір жол вокзалдарының өкілдері бұл мәселені жиын аяқтала салысымен, дәлірек айтсақ, 25 мамырда республика деңгейінде көтерді. Мұны «Атамекен» ҰКП төрағасының орынбасары Юлия Якупбаева да атап өтті. Оның айтуынша, Ashyq жобасына қосылмас бұрын темір жол вокзалдарында алдын ала дайындық жұмыстары жүргізілуі тиіс екен. Осыған байланысты бұл мәселе сәл кейінге шегеріліп, індетке қарсы күрес жөніндегі салааралық комиссияның таяу күндері өтетін отырысында қаралатын болып шешілді.
Облыстық кәсіпкерлер палатасының мәліметінше, бүгінгі таңда өңірде Ashyq жобасына 232 кәсіпорын қатысып жатыр.
– Қазір жобаға қатысқысы келетіндердің жалпы тізімі жасалып жатыр. Ынта білдірушілерден күн сайын өтінімдер келіп түсуде. Ashyq мобильді қосымшасына қатысты сауалы бар кәсіпкерлердің 8 7142 394208 және
8 777 268 47 08 нөміріне хабарласуына болады. Біз мәселенің бәрін түсіндіріп, көмектесеміз, – деді облыстық кәсіпкерлер палатасы директорының орынбасары Генадий Кукоба.
Ал аймақ басшысы Архимед Мұхамбетов облыстық жедел штаб отырысында өңір кәсіпкерлерінің Ashyq жобасының мәні мен пайдасын әлі де дұрыс түсінбей отырғанын ескертіп, облыс тұрғындарын індетке қарсы ортақ жобаға белсенді атсалысуға үндеді. Сонымен қатар қалалар мен аудандар әкімдеріне осы бағыттағы жұмысты күшейтіп, жобаның жүзеге асырылуын бақылауға алуды, ақпараттық-түсіндіру жұмыстарын жүргізуді тапсырды.
