Оқиға 1 маусымда Қызылорда қаласына қарасты Тасбөгет кентінде болған. Дарияға шомылуға барған екі бала суға батып кеткен. Олардың бірінің денесі сол маңда жүрген балықшы жағаға алып шыққан. Ол 2008 жылы дүниеге келген жасөспірім екені анықталды.
«Екінші баланы Төтенше жағдайлар департаменті құтқарушылары сол күні іздестірді. Іздеу нәтиже берген жоқ. Іздестіру шаралары бүгін, 2 маусымда жалғасты. Баланың денесі сағат 9.04-те өзі суға түскен жерден 100 метрдей қашықта су астынан табылды», деді облыстық Өрт сөндіру және авариялық құтқару жұмыстары қызметінің баспасөз хатшысы Әлия Ережепова.
