Спорт • 13 Маусым, 2021

Теннисшілердің тарихи жетістігі

83 рет көрсетілді

Теннистен «Үлкен дулыға» санатына енетін биылғы Франция ашық чемпионаты қазақстандық спортшылар үшін өте табысты аяқталды. Жекелей сында спортшыларымыз жартылай финалға дейін жетсе, ерлер арасындағы жұптық сында өнер көрсеткен Александр Бублик пен Андрей Голубев тұңғыш рет Ролан Гаррос турнирінің финалында бақ сынады. Қазақстан теннисі тарихында мұндай ірі доданың финалында ойнау бақыты бұрын-соңды ешбір теннисшіге бұйырмаған болатын.

Тарихи табысқа қол жеткізген жерлестеріміз Ролан Гаррос жарысының бастапқы бәсекесінде франциялық жұп Фабьен Ребуль мен Садио Думбияны екі сетте 7:6, 6:1 есебімен жеңіп, турнирді сәтті бастады. Екінші айналымда олар дәл осындай есеппен хор­ватиялық Иван Додиг пен словакиялық Филип Полашектен басым түсті. Ал үшінші айналымнан бастап қазақстандық жұп азулы қарсыластармен бақ сынаса бастады. Мәселен, плей-офф кезеңінде Франция ашық чемпионатының 11-ракеткалары, нидерландтық Уэс Колхоф пен Жан-Жюльен Ройермен кез­десіп, тартысты өткен ойында Бублик пен Голубев 7:6, 3:6, 6:4  нәтижесімен жеңіске жетті.

Жерлестеріміз Ролан Гар­ростың ширек финалында тағы бір тәжірибелі теннисшілер мо­наколық Хьюго Нис пен гер­маниялық Тим Пюцпен кез­десті. 1 сағат 16 минутқа жалғас­қан ойын­да А.Бублик пен А.Го­лу­бев қарсыластарынан еш қиын­дықсыз басым түсті. Бірінші сетті қазақстандық спортшылар 6:4 есебімен өз пайдаларына шешсе, екінші сетте де 6:4 нәтижесімен басымдық танытты. Сөйтіп тур­нирдің жартылай финалында ойнауға мүмкіндік алды.

33 жастағы А.Голубев пен одан он жас кіші А.Бублик бұ­ған дейін «Үлкен дулыға» тур­нирлерінде жұптық сында бір мәрте өнер көрсеткен болатын. Міне, биыл екінші рет жартылай финалда бақ сынады. Жеті жыл бұрынғы бәсекеде А.Голубев аустралиялық Сэм Гротпен бірге Ролан Гаррос турнирінің жартылай финалына дейін жетіп, болашақ жеңімпаздар Жюльен Беннето мен Эдуард Роже-Вассленге 6:3, 3:6, 4:6 есебімен есе жіберген-ді.

Сондай-ақ А.Бублик тағы бір қазақстандық теннисші Ми­хаил Кукушкинмен бірге 2020 жылғы Аустралия ашық чемпионатының жартылай финалында болашақ чемпиондар, америкалық Раджив Рам мен ұлыбританиялық Джо Солс­бе­риден 6:4, 3:6, 4:6 есебімен ұты­лып қалған болатын. Бұл жо­лы жерлестеріміз жартылай финалда испаниялық жұп Пабло Андухар мен Педро Мар­тинеспен күш сынасты. Матч­ты қарқынды бастаған испаниялық жұп бірінші партияда 6:1 есебімен басым түс­кенімен, кейінгі екі сетте жер­лестеріміз қарсыластарын бет қаратқан жоқ – 6:4, 6:4. Қазақ­стандық жұп – финалда!

Финалдық сайыста отандас­тарымыз 99,9 пайыз жергілікті жанкүйерлердің қолдауымен өнер көрсеткен корт иелері Пьер-Юг Эрбер – Николя Маюмен шеберлік байқасты. Матч алдында теннис мамандары франциялық жұптың еш қиындықсыз же­ңіс­ке жететінін болжаған. Се­бебі Эрбер мен Маю «Үлкен ду­лыға» санатына енетін төрт ірі жарыстың (АҚШ ашық чемпионаты, Аустралия ашық чемпионаты, Франция ашық чемпионаты және Уимблдон турнирі) бәрінде жұптық сында топ жар­ған тәжірибелі теннисшілер саналады.

Финалдық сайыстың бірінші партиясында өте сенімді ойнаған қазақстандық жұп алғашқы партияны өз пайдаларына шешті – 6:4. Екінші сетте де Бублик пен Голубев жеңіске жетуге бір табан жақын тұрған-ды. Алайда жиі қателікке бой алдырған жер­лестеріміз бұл партияны қарсы­ластарына беріп қойды – 6:7. Шешуші сетте екі жұп та өте сақ ойнап, өз мүмкіндіктерін тиімді пайдаланып отырды. Тек жетінші геймге келген кезде Маю мен Эрбер жалғыз брейк-пойнтты тиімді пайдаланып, турнирдің бас жүлдесін жерлестерімізден тартып алды. Қорытынды есеп – 6:4, 6:7, 6:4. Осылайша, жерлес­теріміз Ролан Гаррос жарысының жұптық сынында вице-чемпион атанды.  

Әйелдер арасындағы жекелей сында әлемдік рейтингте 33-орында тұрған Чехия спортшысы Барбора Крейчикованың мерейі үстем болды. Ол финалда ресейлік спортшы Анастасия Павлюченкованы үш сетте 6:1, 2:6, 6:4 нәтижесімен қапы қалдырды. Айта кетейік, Пав­люченкова жартылай финалда отандасымыз Елена Рыбакинадан айласын асырып, финалға жолдама алған болатын.

Соңғы жаңалықтар

Алматыда троллейбус өртенді

Оқиға • 24 Маусым, 2022

ТүркПА-ның атауы өзгереді

Парламент • 24 Маусым, 2022

Ұқсас жаңалықтар