Спорт • 13 Маусым, 2021

Доп додасы тосын оқиғалармен басталды

114 рет көрсетілді

Жұмадан сенбіге қараған түні Италия астанасы – Римде футболдан 16-шы Еуропа чемпионатының шымылдығы түрілді. Кәрі құрлық біріншілігі «ә» дегеннен күтпеген оқиғалармен бас­талды. Чемпионаттың алғашқы голын Түркия құрамасының футболшысы өз қақпасына соғып алса, Дания-Финляндия арасындағы матчтың бірін­ші таймында дат футболшысы Кристиан Эриксен есінен танып, стадионға жи­налған және ойынды теледидар арқылы тамашалаған миллиондаған жанкүйерді уайымға салып қойды.

Сонымен биылғы Еуропа чемпионаты Түркия және Италия құрамаларының ара­сындағы ойыннан бастау алды. Жан­күйерлермен қатар футболшылардың өзде­рі де мұндай ірі доданы қатты сағынып қалған болуы керек, біріншіліктің алғашқы кез­десуінен-ақ турнир тартысты басталды. Өз тобының көшбасшысы болады деп күтілген екі ұжымның арасындағы ойын тек үш ұпайға ғана емес, тактикалық күреске де толы болды деп айта аламыз.  

Кездесудің бірінші таймы 0:0 есебімен тең аяқталып, екінші таймда Италия футболшылары Түркия құрамасының қақпасына жауапсыз үш гол соқты. Италиялықтардың бірінші таймның соңында пенальтиден  есепті ашатын мүмкіндіктері болған еді. Алайда төреші Дэнни Маккели Еуропа чемпионатында биыл тұңғыш рет қолданылып жатқан VAR көмегіне жүгініп, түркиялық футболшы ойын ережесін бұзбаған деп тапты. Екінші таймның 53-минутында Доменико Берардидің алыс­тан шірене тепкен добы байқаусызда «Ювентус» клубында өнер көрсететін Түркия құрамасының қорғаушысы Мерих Демиралға тиіп, доп қақпа торынан табылды. Осылайша Еуропа чемпионатының тарихында турнирдің алғашқы голы автогол ретінде тіркелді. Матч Италияда өтсе де, ресми түрде қонақ команда болып ойнаған Италия кездесу соңына дейін Түркия қақпасына тағы екі гол соғып, бірінші матчта 3:0 есебімен жеңіске жетті.

Ал Бакуде өткен топтағы екінші кездесуде Уэльс матч соңына қарай таразы ба­сын теңестіріп, жеңілістен аман қалды. Екін­ші таймның 49-минутында Швейцария құра­масының футболшысы Брель Эмболо есеп ашса, 74-минутта Киффер Мур Уэльстің қарымта голын соғып, құрамасына маңызды бір ұпайды әперді.

В тобындағы Дания мен Финляндия ара­сындағы кездесуде күтпеген оқиға тіркелді. Ойынның бірінші таймы аяқталар тұста Дания құрамасының жартылай қорғаушысы Кристиан Эриксен есінен танып қалды. Дәрігерлер келгенше футболшыға әріптестері алғашқы медициналық көмек көрсетіп, ерлік жасады. Кейіннен дәрігерлер футболшыға алаңда 15 минутқа жуық уақыт көмек көр­сетіп, жасанды тыныс алу аппаратымен есін жиғызуға тырысты. Бір айта кетерлігі, Эриксенге медициналық көмек көрсетіліп жатқанда Дания футболшылары шеңбер құрып жинала қалып, көрермендерге қай­ғылы жағдайды көрсетпеуге тырысты. Ойын­шылардың бұл іс-әрекетін дүниежүзі жанкүйерлері бас бармақпен бағалауда. Реа­ни­мациялық ем жасалып болған соң, Эриксенді жедел жәрдем көлігімен аурухана алып кетті. Кейіннен УЕФА ресми мәлімдеме жасап, футболшы есін жиғанын және өзін жақсы сезініп жатқанын айтты.

Дәл осы жағдайға ұқсас оқиға 2003 жылы Конфедерация кубогында да болған еді. Камерундық футболшы Марк-Вивьен Фоэ Колумбиямен өткен кездесудің 72-минутында есінен танып құлап, сол  күйі о дүниеге аттанып кеткен болатын.

Дания мен Финляндия арасындағы матч 1,5 сағатқа кейінге шегеріліп, екі құ­рама футболшыларының өтінішімен қайта жалғасты. Кездесудің фавориті саналған Дания екінші таймда күтпеген жерде өз қақпасына гол өткізіп алып, 0:1 есебімен жеңіліп қалды. Ал Еуропа чемпионатына тұңғыш рет қатысып жатқан Финляндия бірінші матчтында жеңіске жетіп, турнирдің алғашқы сенсациясын жасады.

Осы топтағы екінші ойында Ресей құрамасы Санкт-Петербургте Бельгиядан ойсырай жеңілді – 0:3.

Соңғы жаңалықтар

Алматыда троллейбус өртенді

Оқиға • 24 Маусым, 2022

ТүркПА-ның атауы өзгереді

Парламент • 24 Маусым, 2022

Ұқсас жаңалықтар