Жалпы Үржар ауданының таулы бөлігінің өсімдіктері мен топырақтары биіктік белдеуге сәйкес тараған. Мұнда таулық күлгін, таулық шалғынды топырақ белдемдерінде шалғынды шөптер, өзен бойларында қайың, терек, жабайы алма, әртүрлі жемістер мен жидектер, тау етектерінде селеулі-бетегелі шөптер, шөлейтті бөлігінде жусан, бұйырғын, көкпек, баялыш, жүзгін, ши, т.б. өседі. Мамыр айында да жататын Тарбағатай биіктеріндегі қар, күн ыси тау етектеріне қарай жылғалап еріп ағады.
Ал тауда жануарлар дүниесінен Тянь-шянь қоңыр аюы, арқар, марал, қасқыр, түлкі, қоян, елік, борсық, құстардан құр, шіл, қарға, сауысқан, көгершін, өзен бойлары мен көлдерде қаз, үйрек, тырналар мекендейді. Осы байлықты сақтап қалу үшін атсалысатын бірден-бір мекеме – «Тарбағатай» ұлттық мемлекеттік табиғи паркі. Парк ауданның өркендеуіне үлкен үлесін қосып, табиғатты қорғап, Қызыл кітапқа енген жан-жануарлардың өсіп-өнуіне мол ықпал етуде.
Әр жан өз өңірінің табиғатын қорғауға міндетті. Табиғат дегеніміз – бізді қоршаған орта: жан-жануарлар мен өсімдіктер қоры. Ал «Тарбағатай» ұлттық мемлекеттік табиғи паркі осы мақсаттарын ойдағыдай атқарып, биологиялық және ландшафтық алуандықты сақтап қалу үшін еңбек етуде.
Роман БАЙСАЛБАЕВ,
«Тарбағатай» мемлекеттік ұлттық табиғи паркінің орман шебері
Шығыс Қазақстан облысы