Қазақстан • 16 Маусым, 2021

5 жылда – 2 млрд ағаш

9 рет көрсетілді

Орман деген – оттегі. Ағаш отырғызу игілікті іс қана емес, айналаны тазартатын, қатты дауыл мен аңызақ желден қорғайтын қорған іспетті. Қазақ елі экологиялық мәселелерге, оның ішінде жасыл желекті көбейту жұмыстарына да көңіл бөліп келеді. Қазіргі жоспар – еліміздің орман қорына бес жылдың ішінде екі млрд ағаш отырғызу. Бұл туралы кеше Орталық коммуникациялар қызметінде өткен брифингте Экология, геология және табиғи ресурстар вице-министрі Әлия Шалабекова мәлімдеді.

Вице-министрдің айтуынша, бес жылдың ішінде милиардттаған ағаш отырғызу жөніндегі ауқымды жоба Мемлекет басшысы Қасым-Жомарт Тоқаевтың тапсырмасымен жүзеге асырылып жатыр. Жобаны іске асыру шеңберінде министрлік облыс әкімдіктерімен бірлесіп, орман қорын молайту мен желек өсірудің 2021-2025 жылдарға арналған кешенді жос­парын әзірлепті. Іс-шаралардың ішінде жергілікті әкімдіктер орманшылармен, халықаралық донорлармен, табиғи аумақты қорғаушылармен, өзге де бас­та­машыл топпен бірге, ағаш отыр­ғызуды қолға алған.

Министрліктің мәліметінше, Қазақстан шағын орманды мемлекеттер қатарына жатады. Орман қоры бар жердің жалпы ауданы 30 млн гектарды құрайды, бұл – ел аумағының 11%-ы. Орманы көп аудандар Қызылорда, Жамбыл облыстарында орналасқан. Бұл өңірлердегі жасыл желектің көбі –  негізінен сексеуіл екпелері. Ал Шығыс Қазақстан және Алматы облыстары ең құнды ағаш түрлерімен ерекшеленеді. Атап айтқанда, басқа өңірлерде көп кездесе бермейтін майқарағай, самырсын, балқарағай және шырша осы аймақтарда шоғырланған.

Келешекте елімізде ағаштар­дың түрі де көбейеді. «Біз қолға ал­ған жобалардың бәрі, оның ішін­де облыстар аумағында ағаш отыр­ғызу жұмысы ғылыми ұсыным­дар мен орман өсіру талаптарына сәйкес жоспарланғанын атап өткен жөн. Ал жоспардағы 2 млрд ағаштың ішінде сексеуіл – 610 млн дана, қарағай – 555 млн-нан астам, үйеңкі – 193 млн, шегір­шін – 132 млн, қайың 100 млн да­на­дан астам бар. Бұдан өзге де ағаш тұқымдарын отырғызу жос­пар­ланған», дейді вице-министр.

Ағаштардың көбін әкімдіктер отырғызбақшы. Ал орман пайдаланушылар мен халықаралық донорлар 208,5 млн ағашты мойнына алған. Жекелеген ұйымдар барлығы 251,8 млн ағаш егуді жос­парлап отыр.

Жобаны қаржыландыру үшін бес жыл ішінде республикалық бюд­жеттен –  22,4 млрд теңге, жергілікті бюджеттерден 60 млрд теңге бөлінуі керек.

2021 жылға арналған рес­пуб­ликалық бюджетті нақтылау шең­берінде министрліктің табиғат қорғау мекемелеріне Ұлттық қор­дан 3 281,4 млн теңге мөлшерінде қосымша қаржы бөлінген. Со­ның 1 746,9 млн теңгесі техника мен жабдықтар сатып алуға жұм­салады.

Осы қаржыландыру аясында 209 бірлік мамандандырылған авто­техника, жабдықтар мен өнді­рістік мақсаттағы құралдар сатып алу жоспарланған екен.

Вице-министр еліміздің орман қорын тиімді қорғау және дамытуға байланысты қолға алынған шара­ларға да тоқтала кетті. Оның айтуынша, бүгінде ормандағы өртті болдырмау, заңсыз ағаш кесу мен құрылыстарды бақылайтын арнайы платформа жұмыс істейді. Соның аясында интерактивті картаны енгізу де жоспарда бар. «Бұл цифрлы картаның орманды қорғау, оның қорын молайту бағытындағы пайдасы көп болмақ. Атап айтқанда, орман мекемелерін орамдық желімен тікелей байланыстыра отырып, құрылған орман учаскелерін, алаңдарды және тұқымдық құрамды анық­тау­ға мүмкіндік береді. Орман қорғау­шылары бес жылдық кезең ішін­де желек отырғызу учаскелерін карта арқылы бақылай алады. Интер­активті картамен және мобиль­ді құрылғылармен тәулік бойы жұ­мыс істеуге болады. Демек, орман алқабы күні-түні мамандардың бақылауында болып, қорғалады деген сөз», деді Ә.Шалабекова.

Елдің төрі – елордаға да 1997 жылдан бастап қолдан орман отырғызыла басталғаны белгілі. Брифингке қатысушылар бұл жөнінде де айта кетті. Экология, гелогия және табиғи ресурстар министрлігі Орман шаруашылығы және жануарлар дүниесі комитеті төрағасының міндетін атқарушы Ерлан Құтпанбаевтың сөзінше, астана айналасын жасыл желекке бөлеген алқап аумағы бүгінде 90 мың гектарды құрайды. Әлі күн­ге дейін жалғасып келе жатқан жұ­мыстар аясында барлығы 146 млн ағаш, бұта тұқымдары отырғы­зылыпты. Биылғы көктемде бас шаһардың жасыл белдеуі 4 млн-нан астам ағашқа көбейген.

 

Соңғы жаңалықтар

Ертең Үкімет отырысы өтеді

Үкімет • Бүгін, 15:00

Елімізде 5,4 млн адам вакцина салдырды

Коронавирус • Бүгін, 10:45

Шаппа шот пен «құйрықты» пышақ

Аймақтар • Бүгін, 08:32

Жаңаөзендегі жылыжай

Аймақтар • Бүгін, 08:30

Той тойлау тоқтамай тұр

Коронавирус • Бүгін, 08:24

Тауар айналымында өсім бар

Экономика • Бүгін, 08:12

Ұқсас жаңалықтар