Жалпы, «мурал» сөзі ағылшыншадан аударғанда «қабырғадағы сурет» деген мағынаны білдіреді. Сондай көз тартар суреттің бірі, Жақып Омаров көшесіндегі 64 мекенжайындағы «Театральный» бульвары мен DEMALYS PROMENADE жаяу жүргіншілер көшесінің ортасында Алдар көсе бейнесіндегі, халқымыздың біртуар ұлы, көрнекті режиссер Шәкен Аймановтың жаңа муралы ашылды. Бұл картина «Алдар көсе» киносындағы стоп-кадр. Атақты актер осы туындыны өзі түсіріп қана қойған жоқ, басты рөлдегі – «Алдар көсені» тамаша ойнағаны мәлім. Сондықтан да көрермендер халық ауыз әдебиетіндегі ақылды айлакер кейіпкеріміздің бейнесін марқұм Шәкен ағаның өрелі өнерімен жақын таныды деп айтуға болады. Муралдың авторы, суретші Асхат Ахмедияров. Ол өз жұмысында театр өнерін айқындайтын қызыл перде арқылы дала образындағы шынайы өмірдің бейнесі мен шығармашылық әлемді әдемі үйлестіре білген.
