Туризм • 30 Маусым, 2021

Туристерді бақылайтын жоба

337 рет
көрсетілді
3 мин
оқу үшін

Елордадағы Sheraton Nur-Sultan Hotel қонақүйінде eQonaq – туристерді есепке алу, туристік ағынды талдау және көші-қон бақылауын жүзеге асыруға арналған бірыңғай ақпараттық жүйесінің жұмысы таныстырылды.

Туристерді бақылайтын жоба

Іс-шараға Мәдениет және спорт министрі Ақтоты Ра­йым­құ­лова, вице-министр Ға­би­долла Әб­дірахымов, күш құ­ры­лым­да­ры және туристік бизнес-қоғамдастықтың өкілдері қа­тысты. Ведомоство басшысы өзінің алғы сөзінде туризм са­ласының қазіргі таңдағы негізгі міндеттерінің бірі – цифрландыру және туристердің келу процестерін жеңілдетуге ар­налған ақпараттық жүйелерді кеңінен енгізу екенін атап өтті.

Ал Kazakh Tourism басқарма төрағасы Ержан Еркінбаев шет­­ел­дік туристерді тарту мә­се­ле­лерінде олардың санын ғана емес, атап айтқанда, туристер біздің елде қанша күн тоқтайтынын, қан­дай орындарға жиі баратынын, қандай қызмет­терді пайдаланатынын білу ма­ңызды екенін айтты.

«Шетелдік туристердің Қазақ­станда болған күндер санын есептеу үшін қонақүйде тұрғаны туралы мәліметтерді алу қажет. Біз әрбір қонақүй өз қонақтарының есебін жүргізетінін және оларда осындай мәліметтердің бар екенін білеміз. Міндет – осы де­ректерді бір­ыңғай талдау жүйе­сіне жи­нақ­тау», деді Ержан Еркін­баев.

Жоба дайындаушылардың хабарлауынша, eQonaq жүйесі Қазақ­станның туристік саласын да­мытудың 2019-2025 жыл­дар­ға арналған мемлекеттік бағ­дар­ламасының жүйелі іс-шарасы және бастапқыда турис­тік ағын статистикасын реттеуді көздеген болатын.

Сондай-ақ өткен жылдың қаңтарында Президент Қасым-Жомарт Тоқаев шетелдік турис­терді міндетті тіркеуден бас тарту керектігін мәлімдеген еді. Енді бұл функция орналастыру орындарына бекітілген. Ал көші-қон қызметтеріне ақпарат берудің одан арғы процестерін оңайлату үшін eQonaq жүйе­сі осы міндеттерге сай инте­гра­ция­ланған.

еQonaq жүйесін тәжірибе жүзінде пайдалануды Kazakh Tourism ұлттық компаниясы 2020 жылдың IV тоқсанында жүзеге асырған. Қазіргі уақытта жүйе Нұр-Сұлтан және Алматы қалаларында, сондай-ақ Ақмола және Солтүстік Қазақстан облыс­тарындағы 383 орналастыру орнында (қонақүйлер, хостелдер, демалыс үйлері және т.б.) 21985 туристі тіркеп, енгізген.

Сонымен қатар жүйені дайын­даушылар Ashyq жүйесімен интеграциялауды жоспарлап отыр.

«Өздеріңіз білетіндей, Ashyq жүйесінің арқасында адамдар кинотеатрларға, дәмханалар мен мейрамханаларға қайта кіргізе бастады. Ол үшін тек ЖСН-іңізді енгізіп, QR кодты сканерлеу қажет. Алайда шетелдіктер ЖСН-сіз қазақстандық жүйені пай­­­далана алмайды, жүйеде шет­елдіктер туралы деректер жоқ. Бұл деректерді біз eQonaq жүйесі арқылы ала аламыз. Бұл турис­терге ел ішінде қауіп-қатерсіз жү­руге мүмкіндік береді, сонымен қатар біз үшін туристер тоқ­таған жерлерге ғана емес, сонымен бірге олар орналасқан жер­лерге де қосымша мәліметтер қосады. Бұл туризм саласындағы инфрақұрылымды жоспарлау кезінде де көмектеседі, өйткені біз туристер легін көреміз», деп мә­лімдеді Ержан Еркінбаев.

Осы жылдың маусым айында Алакөл, Балқаш, Атырау және Ақтау қонақүйлеріне eQonaq жүйесі кезең-кезеңімен енгізілді. Жыл соңына дейін еліміздің басқа да туристік аймақтарын қамту және eQonaq жүйесі бар қонақүйлер санын 600-ге дейін жеткізу жоспарланып отыр.