«Гаухар Тас» тұрғын үй кешені екі жыл бұрын пайдалануға берілуі тиіс еді. Бірақ бір пәтерді бірден бірнеше сатып алушыға сатып үлгерген құрылысшы қашып кетті. Полиция қызметкерлері күдіктіні ұстап, тергеу изоляторына отырғызды. Бірақ 200-ге жуық үлескер қоныстарына әлі де көше алмайды, себебі құрылыс жұмыстары аяқталмаған. Үлескерлер бұл нысан басқа құрылыс компаниясына өтпегенін айтады, өйткені мүлік бұрынғы иесіне тиесілі. Құжаттарды өткізу үшін сот шешімі қажет.
«Біз сот отырысын күте алмаймыз, өйткені ол бірнеше жылға созылуы мүмкін. Бізде ондай мүмкіндік те, уақыт та жоқ. Адамдар соңғысын берді, пәтерлерін сатты. Мүгедектер, жалғызбасты аналар, олар қазір жалдамалы пәтерде тұрып жатыр. Сотқа дайындық жарты жылдан астам уақыт бойы жүріп жатыр, барлық құжаттар мен үлескерлердің тізімі сотқа ұсынылды», деп шағымданды Ақтау тұрғыны Ұлмекен Кенжебаева.
Сот отырысы 2021 жылдың 15 шілдесіне белгіленді. Бұл іс бойынша қарау мерзімі әлі аяқталған жоқ.
«Сот бұл істі әдейі созып жатыр деген дәлелдер мүмкін емес деп санаймын. Өйткені процесс тағайындалып, іс заңмен белгіленген мерзімде қаралады. Аталған іс бойынша процессуалдық мерзімдер бұзылмаған», деп түсіндірді Ақтау қалалық № 2 сотының төрағасы Рахымжан Бейсенов.
Қылмыстық іс осы айда сотқа беріледі. Полицияның мәліметінше, жанжалды құрылысшы «Алаяқтық» бабы бойынша қамауға алынған. Ол мүлкін тәркілеп, жеті жылға дейін бас бостандығынан айырылуы мүмкін.
