«Азаматтарға арналған үкімет» мемлекеттік корпорациясының Батыс Қазақстан облысы бойынша филиалы директоры Нәдір Құрымбаев өңірде короновирус таралуы күшейіп тұрғандықтан, халыққа қызмет көрсету орталықтарына балама болатын бұрыштарды көбірек ашу жөнінде тапсырма берді.
«Ақпараттық даму, инновациялар және аэроғарыш өнеркәсібі министрі Бағдат Мусиннің және облыс әкімі Ғали Есқалиевтің тікелей тапсырмасы бойынша өзіне- өзі қызмет көрсету секторлары Орал қаласының әр аумағынан ашылып отыр. Бұл секторлар халыққа қызмет көрсету бөлімдеріне жүгінбестен, электрондық қызметтерді өз бетімен алуға мүмкіндік береді. Сол арқылы ХҚО бөлімдерінде адамдардың көптеп жиналуын болдырмауды көздеп отырмыз», деді Н.Құрымбаев.
Айта кетейік, аудандық халыққа қызмет көрсету бөлімдерінде өзіне-өзі қызмет көрсету бұрышы бұрыннан бар. Ауылдық округтерде электрондық қызметті жергілікті әкімдікте алуға болады.
Бүгінде өзіне-өзі қызмет көрсету секторлары дүйсенбі-жұма күндері таңғы сағат 9.00-ден кешкі 18.00-ге дейін ашық болады.
