«Жұмағалиева Н» шаруа қожалығының жетекшісі Оспан Алмастың айтуынша, аталған жобаның құны 1,4 млрд теңгені құрайды. Оны биылғы төртінші тоқсанда іске қосу жоспарланып отыр.
– Құрылыс алаңында 14 адам жұмыс істейді. Қазір жылыжай нысанының қабырғасы құрастырыла бастады. Электр мен газ желісі тартылды. Бұл жылыжай іске қосылғанда 350 адамды жұмыспен қамтуды жоспарлап отырмыз. Мұнда жылына 350 тоннаны құрайтын қияр мен қызанақ өсіріледі, – дейді О.Алмас.
Облыс әкімі Махамбет Досмұхамбетовтің айтуынша, мемлекет тарапынан ауыл шаруашылығы саласын дамытуға көрсетілетін қолдау көп. Ал мұнайлы өңірге азық-түлік белдеуін құру үшін дәл осындай жобалар қажет. Өйткені тұрғындарға сапалы әрі арзан көкөніс өнімдерін ұсынуды көздейтін бұл жылыжайда да жұмыс орындары ашылады. Жылыжай өнімдері жергілікті нарықтағы бағаның тұрақтануына ықпал етеді.
Атырау облысы