Қазақстан Мұсылмандары діни басқармасы ұсынған мәліметке сәйкес, ел бойынша 2500 адам онлайн құрбандық шалуға тапсырыс берген. Бұл тек түске дейінгі ғана көрсеткіш. Сақтық шараларын ұстанған халық құрбандық шалудың жаңа форматын таңдау үстінде. Әр тапсырысты Қазақстан Мұсылмандары діни басқармасының өкілдері ресми тіркеп, оның орындалуын басқарма мамандары жіті қадағалайды.
Бүгін еліміздің бас мүфтиі елорда маңындағы құрбандық шалуға арналған орындарды аралап шықты.
«Қазақ елі әрқашан да құрбандық шалған, бұл дәстүрімізге сай қалыптасқан дүние. Кез келген кісі сапарда немесе сыртта жүрсе де бұл дәстүрді ұмытпаған. Бірақ қазіргі уақытта құрбан шалу қала тұрғындарына қиынға соғады, яғни қала сыртындағы мал базарға барып, мал таңдау керек. Осы орайда құрбандық шалып, қол ұшын созамын деген жандар оны онлайн түрде іске асыра алады. Сонымен қатар онлайн құрбандық шалу дәстүрін біз әлі де жетілдіре түсеміз және оны алдағы уақытта тек Құрбан айт мейрамында ғана емес кез келген сәтте қолдану мүмкіндігі болады деген үміттеміз. Байқағанымыздай онлайн құрбандыққа тапсырыс берушілердің саны артып келеді», деді еліміздің Бас мүфтиі Наурызбай Қажы Тағанұлы.
Оның айтуынша, онлайн құрбандық шалуға тапсырыс көбінесе Нұр-Сұлтан мен Алматы қалаларынан түсіп жатыр.
Айта кетсек, онлайн құрбандық шалу тәжірибесі Түркия, БАӘ және Малайзия елдерінде кеңінен таралған.
