Сайлау • 22 Шілде, 2021

Бақ шаба ма, бағдарлама оза ма?

2130 рет көрсетілді

Ауылдық округтер әкімінің сайлауы өзгеше өтпек. Бұл әкімнің орынтағынан үміттілерді де, оларға дауыс беретін ауыл тұрғындарын да белсенділік танытуға ширықтырып отыр.

Облыстық аумақтық сайлау комис­сиясының төрағасы Азамат Аймана­кумовтің мәліметіне сүйенсек, Атырау қаласы мен алты аудандағы 18 ауылдық округтің әкімі сайланады. Ал Мақат ауда­нында 1 кент пен 2 ауылдық округ әкімдерінің сайлауын өткізу жоспар­ланбаған. Себебі бұл аудандағы округ әкімдерінің өкілеттік мерзімі аяқталмаған.

– Әкімдері сайланатын окургтерде 44 мың 500 сайлаушы бар. Қазір бұл округтерде 236 сайлау комиссиясы құрылды. Округ әкімдерінің сайлауына 73 үміткер ұсынылған. Оның ішінде 39 үміткер (53,4%) – саяси партиялардың өкілі. Ал 34 үміткер (46,6%) өзін өзі ұсынып, әкім сайлауына қатысуға ниет білдірді. Мәселен, Nur Оtan партиясы 15, «Ауыл» ХДПП – 5, «Ақ жол» ҚДП – 3, АDAL партиясы – 6, Қазақстан халық партиясы – 7 кандидат, ЖСДП 3 үміткер ұсынды. Орташа бәсекелестік 4 адамды құрап отыр.

Оның айтуынша, округ әкімдерінің сайлауына ұсынылған үміткерлердің арасында 34 мұғалім (46,6%), 12 заңгер (16,4%), 10 экономист (13,7%), 8 ауыл шаруашылығы маманы (11%), 1 инженер (1,3%) мен басқа мамандықтың 8 иесі (11%) бар. Саяси додадан 19 әйел (26%) де шет қалғысы келмеді. Ал ең көп үміткер Дамбы ауылдық округінен ұсынылған. Атырау қаласына таяу орналасқан бұл ауылға әкім болғысы келген 7 үміткер бақ сынауға бекініпті. Сондай-ақ Қайыршақты (Атырау қаласы) мен Жарсуат (Индер ауданы) ауылдық округтерінде 6, Құрманғазы ауданындағы Кудряшов ауылдық округінде 5 үміткер сайлауға қатысуға ниет білдірді.

– Ауыл әкімдерінің сайлауы – еліміз­дегі демократиялық дамудың бір көрі­нісі. Бұл сайлауға Nur Otan партиясы­нан ұсынылған үміткерлермен кезде­сіп, басқару жүйесіндегі тетіктер жөнін­де өзімнің тәжірибемді, кейбір ұсыныс­тарымды бөлістім. Ең бастысы, ауыл тұрғындары округ әкімінің лауазымына үміткерлерге дауыс береді. Елімізде бұрын мұндай сайлау болған емес. Бұған дейін ауыл әкімдері аудандық, қалалық депутаттардың дауыс беруімен сайланатын еді. Енді, міне, бар жауапкершілік жүктелген ауыл тұрғындары іскерлік, ұйымдастырушылық қыры басым үміткерлерді таңдайтыны даусыз, – дейді Мәжіліс депутаты Нұрлыбек Ожаев.

Ауыл әкімінің орынтағы үшін сайлау додасына түскен үміткерлер сайлау­шыларға бағдарламасын ұсынып, үгіт-насихатын бастады. Бақ шаба ма, әлде бағдарлама оза ма?

 

Атырау облысы

 

Соңғы жаңалықтар

Шаманың әні

Өнер • Кеше

Сотталған жырлар

Әдебиет • Кеше

9 ай «толғатқан» 9 пайыз

Экономика • Кеше

Атом көлге сапар

Аймақтар • Кеше

Ұқсас жаңалықтар