Даланың даналығын бойына сіңірген жұртымызда ризашылық рәуішпен айтылатын, «басың аман, бауырың бүтін болсын» дейтін тілек бар. Бауырдың бүтіндігі денсаулықтың діңгегі болған-ау шамасы. Болат Мұқановтың денсаулығында кінәрат бары осыдан үш жыл бұрын белгілі болған. Өзінің айтуына қарағанда, бауыры сыздағанмен, мән бермеген. «Ауру мысқалдап кіріп, батпандап шығады» демей ме, бірте-бірте ағзадағы сырқат меңдей бастаған. Ендігі амал – ота жасау. Бірақ ол үшін донор керек. Оның қайдан табарсың?! Ағасының жағдайын естіген соң інісі Марат бірден келісімін беріпті.
– Бауырым емес пе, нар тәуекел дедім. Қазір екеуіміздің де денсаулығымыз жақсы. Бұл ісімді ерлік деп есептемес едім. Туған ағамның өмірін ұзартқым келді, – дейді Марат Мұқанов.
Күрделі ота Нұр-Сұлтан қаласындағы ұлттық онкология және трансплантология ғылыми орталығында жасалыпты. Небәрі 33 жастағы Марат өз денсаулығына кінәрат келетін болса да, бауыры үшін бауырын қиған. Айтуына қарағанда, қияндағы Жарқайың ауданының Үшқарасу ауылында жарық дүние есігін ашқан ағайындылар ата-анасынан ерте айырылып, жетімдіктің ащы дәмін татқан екен. Отбасындағы алты баланың үшеуі өмірден ерте озған.
– Қазақстанда мұндай оталар кейінгі кезде жасала бастады ғой. Үлкен апайым Розаға осындай ота жасалғанда дәмі ерте таусылмас еді. Өкініш өзегімді өртейді, – дейді Марат Амантайұлы.
Бауырға деген құрметтің, шынайы сыйластық пен ізеттіліктің белгісі тәрізді осы бір оқиғаның астарында үлкен мән жатыр. Былайғы жұрт біле жүрсін деп қалам тарттық біз де.
Ақмола облысы,
Жарқайың ауданы
