Бір жылда елдегі мобильді интернет жылдамдығы 42% артқан, деген ақпарат таратты Finprom.kz ресурсы. Мобильді интернеттің жылдамдығы 30,18 Мбит/с-қа жеткен. Былтырғы маусым айында бұл көрсеткіш 21,25 Мбит/с болатын, яғни жылдамдықтың артуы жылына 42%-ды құраған. Осылайша, интернет байланысының жылдамдығы төрт ай қатарынан қарқынды өскен.
Жалпы, ТМД елдерінің ішінде Қазақстанда мобильді интернеттің жылдамдығы Ресей, Қырғызстан, Өзбекстан, Беларусь, Тәжікстанға қарағанда жоғары. Рейтингте Малайзия, Египет, Үндістан, Венесуэла сияқты елдерде де мобильді интернеттің жылдамдығы Қазақстаннан төмен болып шыққан.
Жалпы, әлем бойынша мобильді интернеттің орташа жылдамдығы маусым айында 55,34 Мбит/с болған. Ең жылдам интернет БАӘ-да (193,51 Мбит/с), одан кейін Оңтүстік Кореяда (180,48 Мбит/с) және Қатар (171,76 Мбит/с) сияқты елдерде тіркелген. Ал рейтингтің ең төменгі сатысында Ауғанстан тұр, онда мобильді интернеттің қарқыны 7,37 Мбит/с екен.
Биылғы 1 шілдедегі мәлімет бойынша Қазақстанда 24,2 млн абонент бар. Бұл былтырғы көрсеткішпен салыстырғанда 1,2%-ға артық. Оның ішінде 15,8 млн абоненттің интернеті бар. Бұл да өткен жылмен салыстырғанда бірден 7%-ға көбейген. Ал әлемдік желілерге кіретін мүмкіндігі бар абоненттердің үлесі биылғы маусымда 65,3%-ға дейін артқан, былтыр осы уақытта бұл көрсеткіш 61,8% болған.
Бүгінде елімізде үш ұялы байланыс операторы бар. Олардың ішінде ең көп абоненті бар Beeline болып шыққан – 9,5 млн. Содан кейінгі орында Kcell/Activ (8,1 млн абонент) және үшінші Теле2/Altel (6,5 млн абонент).
2021 жылдың алғашқы 6 айында Beeline 1350 базалық станса салып, оған 120 елді мекенді қосқан. Сөйтіп ауылдық жердегі интернет-трафик былтырғымен салыстырғанда бұрын-соңды болмаған рекордтық көрсеткішпен өскен. Жалпы алғанда еліміз бойынша трафикті тұтыну көлемі 62%-ға артқаны байқалады.
