Маусымның аяғынан бастап Аустралияның ең үлкен қаласы дельта штамына байланысты қатаң локдаунда отыр. Биыл Сиднейдегі ең күрделі кезеңде 2500-ден астам адам вирус жұқтырды. Премьер-министр Глэдис Бережиклян карантиннің жоспарланғандай, жұмада аяқталмайтынын мәлімдеді. Қайта қауіпсіздік шаралары қатаңдай түсті. Енді дүкенге бару үшін 10 км-ден артық жүруге болмайды.
Виктория мен Оңтүстік Аустралия аймағы сәрсенбіде індет жұқтырғандар саны азайғаннан кейін карантиннен шықты. Алайда Сидней үшін бұл мүмкін болмай тұр. Қаланың бес миллион тұрғыны осыған дейін қалыпты өмір салтын жүргізген еді.
Пандемия кезінде Аустралия шекарасын жауып, келген жолаушыларды карантинде ұстап, індеттің өршуіне жол бермеген. Алайда вирустың жаңа штамы тараған кезде штат басшылары індетпен күресу үшін қатаң шараларды бірден енгізуге мәжбүр болды.
Сарапшылар Сиднейдегі шектеулер қыркүйекке дейін немесе одан әрі де жалғасуы мүмкін деген болжам айтып отыр. Ел билігі науқастар саны нөлге жақындағанда ғана қайта ашыламыз дейді. Мұндай еркіндікті шектейтін шараларға қарсы болған бірнеше мың адам демалыс күндері Сидней, Мельбурн және басқа қалаларда наразылық шерулерін өткізді.
