– Соның бірі – Атырау қаласының әр бөлігіне есірткі жасырды деген күдікпен ұсталған 27 жастағы жігіт. Күдіктінің уақытша мекенжайын тінту кезінде ұнтақ тәрізді зат, есірткі дозаларын өлшейтін түрлі құралдар табылып, тәркіленді. Тергеуден соң күдікті қала аумағының үш нүктесінде өзі жасырған 60 дозаны құрайтын есірткіні көрсетті. Сараптама қорытындысымен есірткі-пировалерон екені анықталды, – дейді облыстық Полиция департаментінің бастығы, полиция полковнигі Қамза Үмбетқалиев.
Оның айтуынша, есірткіні таратушылар қатарындағы тағы бір жас жігіт анықталған. Әлі екі мүшелге толмаған жігіттің пәтерінен жалпы салмағы
1 кило синтетикалық есірткі заты табылған.
– «Қарасора-2021» жедел алдын алу іс-шарасы кезінде Орал қаласынан келіп, синтетикалық есірткі сатпақ болған 1998 және 1999 жылы туған екі күдікті ұсталды. Олардан зип пакеттерге оралған синтетикалық есірткінің 46 түйірі табылды. Күдіктілердің жалға алған пәтерінен екі пакетке оралған синтетикалық есірткі заты мен 100 дана дайын бетбелгі тәркіленді. Нәтижесінде, жалпы құны 24 миллион теңгеге жуық синтетикалық есірткінің бір реттік 2 400 дозасы заңсыз айналымға жіберілмеді, – дейді
Қ.Үмбетқалиев.
Ал шекарашылар Құрманғазы ауданындағы Сафон ауылдық округінің аумағында 3 гектарға өсірілген есірткі алқабын анықтады. Есірткі алқабында 50 мың түп қарасора өсімдігі өсірілген.
– Есірткі өсімдігін өсіруге атүсті қарамау қажет. Өйткені 20-35 жас аралығындағы жастардың есірткі өнімдеріне қызығушылық танытуы түйткілді мәселеге айналып отыр. Құрманғазы ауданында есірткі өнімдерін сатуға қатысты 6 қылмыс тіркелген. Сол себептен, есірткі өнімдерін тамырымен жойып, контрабандалық қылмыстардың алдын алу мақсатындағы жұмыстар жалғаса береді, – дейді Шекара қызметі Атырау облыстық департаментінің баспасөз хатшысы Өмірбат Айтәлі.
Атырау облысы
