Басы жақсы басталған құрылыстың орта тұсына келгенде мерзімінен кешігуі, сол мақсатқа бөлінген қаржының игерілмеуі әрі жобалық-сметалық құжаттарды әзірлеудегі олқылықтардың орын алуы сияқты келеңсіздіктер де кедергі келтіруде. Мұның барлығы да жұмысты дер кезінде жүргізе алмаған мердігер компаниялардың салғырттығынан болып отыр. Осы мәселеге орай, Жамбыл облысының әкімі Бердібек Сапарбаев талай уақыттан бері тиісті басшыларды сынға алып келе жатқанымен, одан шығып жатқан нәтиже де шамалы болып тұр.
Жалпы, Жамбылда құрылыс саласына жақсы көңіл бөлінуде. Заманауи талапқа сай нысандар салу жөнінен де өңірде жақсы бастамалар көтеріліп, іске асуда. Бірақ соңы сынға апарып соғатын құрылыс нысандары бүгінде көп. Облыстық құрылыс басқармасының басшысы Ерлан Орынбаевтың айтуынша, өңірдегі 207 жобаға 67,6 млрд теңге бөлінген. Бұл ретте биыл 150 нысанды пайдалануға беру жоспарлануда екен. Аталған нысандардың қатарында 76 көп қабатты тұрғын үй, 24 мектеп пен колледж, 10 денсаулық сақтау, 11 спорт және 6 мәдениет нысаны бар. Бұл – бірқатар саланы қамтыған қарқынды құрылыс. Сол сияқты «Нұрлы жер» мемлекеттік бағдарламасы бойынша 131 нысан, «Жұмыспен қамтудың жол картасы» бойынша 23 нысан, «Ауыл – ел бесігі» бойынша 17 нысан және басқа да даму бағдарламалары бойынша 35 нысанның құрылысы жүргізілуде.
Сонымен қатар құрылыс басқармасы тапсырыс беруші ретінде құны 66,7 млрд теңге болатын 43 жобаның құрылысын жүзеге асыруда. Бұл мақсатта биыл 29,1 млрд теңгені игеру көзделген. Осы жылы жалпы құны 22 млрд теңгені құрайтын 26 білім беру нысаны салынуда. Нақты айтқанда, оның ішінде 19 мектеп құрылысы, 5 қосымша құрылыс, колледж ғимараты және мектепті абаттандыру бойынша бір жоба бар екен. Ағымдағы жылы аймақта 14 нысанды тапсыру жоспарланған болса, осы күнге дейін бір нысан пайдалануға беріліпті. Атап айтсақ, Тараз қаласындағы «Мейірім» мектеп-интернатының жапсарлас құрылысы аяқталған.
«Ал облыс орталығындағы №2 мектептің құрылысы баяу орындалуда. Сондай-ақ Шу ауданы Шу қаласындағы Айша бибі және Ы.Алтынсарин, Қордай ауданындағы «Арал» орта мектептерінің сметалық құны қайта есептелуде. Жобалаушылардың қателігі салдарынан Байзақ ауданы, Шахан және Сеңкібай ауылдарындағы мектеп құрылысына қатысты бірқатар қиындық та туындауда. 2019 жылы басталған Байзақ ауданы Сарыкемер ауылындағы №3 колледж ғимаратына жапсарлас нысанның құрылысы 90 пайызға аяқталған. Жобалық-сметалық құжаттамаға түзетулер енгізіліп, сараптама қорытындысы алынды», дейді Е.Орынбаев.
Әбден құрылыс жұмыстары басталып кеткен соң ғана жобалық-сметалық құжаттамаларға өзгерістердің енгізіліп жатуы құптарлық емес. Бұл – құрылыс қарқынына әрі сапасына кедергі келтіретін келеңсіздіктің бірі. Тиісті мердігерлер кезінде уәдені үйіп-төгіп бергенімен, бүгінде белгіленген меже үдесінен шыға алмай отыр екен. Енді құрылыс саласына құрғақ уәденің жүрмейтінін уақыт көрсетуде. Мәселен, екі айдан бері өңірдегі №22 мектептің құрылысы тоқтап тұр. Ал Қордай ауданындағы Күнбатыс-2 массивінде мектептің құрылысы кестеден қалып қойған. Сол секілді Тараз қаласының «Шалғай Қарасу» массивіндегі 600 орындық мектепке әлі күнге дейін электр жарығы тартылмаған. Ал жаңа оқу жылының басталуына бір ай ғана уақыт қалды. Уақыттың тығыздығы артып, мерзімнің таянғаны үдей түскен уақытта асығыс жүргізілген құрылыстың сапасы болмайтыны тағы анық.
Жалпы, Жамбыл облысында жыл басынан бері құрылыс нормалары мен сапа талаптарын бұзғаны үшін 10 мердігер әкімшілік жауапкершілікке тартылып, оларға жалпы көлемі 3,8 млн теңге айыппұл салыныпты. Ал айыппұл салынып, әкімшілік жауапкершілікке тартылғанымен де, тоқтап тұрған құрылыстың жылжып, кешіккен құрылыстың уақытымен қайта жүріп кеткені шамалы. Өзгесін айтпағанда, өңірдегі бірқатар білім беру ошақтары құрылысының өзі қашан аяқталатыны белгісіз болып тұр.
Жамбыл облысы
