Маска киген және бір-бірінен алшақ тұрған наразы азаматтар «Сәтсіз үкімет» деген жазуы бар транспаранттарды, сондай-ақ қара жалауларды желбіретті.
Бұл Малайзиядағы алғашқы ірі демонстрация болды. Өйткені бұған дейін көптеген азамат пандемияға орай енгізілген шектеулерге байланысты және вирус жұқтырудан қорқып, көшеге шықпаған.
Бірақ үкіметтің шектеулеріне, індеттің күшейіп жатқанына қарамастан, азаматтар премьер-министр Мухиддин Ясиннің дағдарысқа ұшыраған әкімшілігін билікте ұстап тұру әрекеттеріне наразы екенін білдіріп, акция ұйымдастырды.
«Біз де күресіп жатырмыз. Себебі адамдар көптеп зардап шегіп жатқан кезде бұл үкімет саясатпен айналысады», деді наразылардың бірі Куала-Лумпурдың орталығында. «Бұл үкімет экономиканың құлдырауына алып келді, сонымен қатар біздің елдегі демократияны бұзды», дейді олар.
«Мухиддин – қорқынышты премьер-министр», деген де пікір айтылды. Наразылар бірауыздан оның отставкаға кетуін талап етті.
Ұйымдастырушылар акцияға 1000-ға жуық демонстрант қатысқанын айтты, бірақ полиция олардың санын 400-ге жуық деп хабарлады.
Полиция жергілікті БАҚ-қа наразылық білдірушілер жиналыстарға тыйым салуды бұзғандықтан, жауапқа тартылғанын мәлімдеді.
Мухиддин билікке өткен жылы реформистік әкімшілік құлағаннан кейін сайлаусыз, жанжалдасқан коалицияның басына келді. Бірақ оның үкіметі одақтастары қолдаудан бас тартқаннан кейін құлдырау алдында тұр.
