Енді міне, Глубокое ауданы әкімінің орынбасары кәсіпкерден пара алды деген күдікпен құрықталып тынды.
Ресми порталдардағы мәліметтерге көз жүгіртсек, сот кабинетінде осы іс бойынша басты сот талқылауын 12 шілдеге тағайындау туралы 2021 жылғы 29 маусымдағы қаулы жарияланған. Ол жерде істі тоқтата тұруға ешқандай негіз жоқ делінген. Яғни күдіктіні күзетпен ұстау түріндегі бұлтартпау шарасы өзгеріссіз қалдырылған.
Ал аудан әкімінің орынбасары 24 сәуірде «Прииртышье 1» ЖШС басшысы Виктор Леонтьевтің арызынан кейін ұсталған көрінеді. Ол лауазымды тұлғалардың орындалған жұмыстар актісіне кедергісіз қол қойғаны үшін ақша қаражатын бопсалау дерегіне және құны 56 миллион теңге болатын аудандық маңызы бар автожолдарды қысқы және жазғы күтіп-ұстау бойынша көрсетілетін қызметтерге тендер өткізу барысында оның кәсіпорны біліктілік талаптарына сәйкес келмеуін алға тарта отырып, заңсыз жарамсыз деп танылғанына шағымданған. Ал шын мәнінде, кәсіпорын 15 жылдан аса уақыт бойы аудан жолдарына қызмет көрсетіп келген екен. Осыншама тәжірибесі бар ұжымның «біліктілік талаптарына сай келмей қалуының» өзіндік сыры бар болып шықты.
– Біздің компаниямыз бұған дейін мемлекет меншігінде болып, жол жөндеу жұмыстарымен айналысқан. 2019 жылы ғана жекешелендіріліп, тың күшпен жұмысқа кіріскен. Алайда жекешелендіру шартының негізінде кәсіпорын 5 жыл ішінде өз бейінін өзгерте алмайды. Оның мақсаты – аудандық маңызы бар жолдарды күтіп ұстау. Яғни компания бұл жұмыстардан басқа жұмыстарды орындай алмайды. Сөйте тұра, бізге бұрын атқарып келген жұмысымызбен айналысуға мүмкіндік берілмегеніне қалай ренжімессің?! – дейді серіктестік директоры Виктор Леонтьев.
Оның айтуынша, жергілікті шенеуніктердің қаһарына ұшыраған кәсіпорынның 23 жұмыскері қазіргі уақытты жұмыссыз қалған. Ашпаған есігі, бармаған жері қалмаған соң Виктор Леонтьев облыстан әділдік табудан күдер үзіп, ел Президентіне жүгінуге мәжбүр болған. Мемлекет басшысы кәсіпкердің шағымын Бас прокуратураға тексеруді тапсырған. Оның нәтижесі белгілі бола бастаған сияқты. Пара алды деген күдікпен аудан әкімінің орынбасары ұсталғандығы – соның айғағы.
Ел Президенті ұсынған «Халық үніне құлақ асатын мемлекет» тұжырымдамасы, міне, осылай жүзеге асып жатқандығына Виктор Леонтьев сынды кәсіпкерлер үлкен үміт артып отыр. Шындығында, бұл тіптен Мемлекет басшысына жеткізбей-ақ, облыс деңгейінде шешілетін мәселе еді ғой.
Баяғыда жұрт: «Бастыққа пара берме, бара бер», деуші еді. Қазіргі шенеуніктер: «Пара бермесең, бара бер...», дейтін болғаны ма, қалай?
Қазір глубокоелықтар тергеу жүргізіліп жатқан шулы істің соңы немен аяқталатындығын тағатсыздана күтіп отыр. Өйткені қолданыстағы заңнама бойынша күдікке ілінген орынбасарының қылмысы сот арқылы дәлелденсе, аудан әкімі отставкаға кетуге тиіс. Жұрт көңілінде «Қарға қарғаның көзін шұқымайды» деген емес пе? Әділдік іздеген кәсіпкердің де ендігі жағдайы қалай болар екен?..», деген алаңдаушылық та бар.
Шығыс Қазақстан облысы
