Бұл қаражатты иелену үшін үміткерлерге конкурстық іріктеуден өтіп, Astana Hub қатысушысына айналу қажет. Шетелдік жобалардың авторларына осы сынға түсу үшін еліміздің астанасына уақытша қоныс аударуға тура келеді.
Seed Money-дан бөлек, үміткерлер акселерацияның қатысушылар ретінде кең ауқымды қолдаумен қамтылады. Атап айтқанда, IT-жоба авторларына тегін жұмыс кеңістігі, оқыту және тәлімгерлік курстары ұсынылып, 500 IT-компаниядан тұратын инвесторлар мен салалық қауымдастық өкілдерімен байланыс орнатумен бірге салықтық және визалық преференциялар, сондай-ақ PR бағытта қолдау мүмкіндігі беріледі.
Astana Hub-тан қаржыландыру тетігіне қол жеткізу үшін іріктеудің 6 кезеңінен өту шарт. Оған өтінім беру және оны тексеріп қарау, өтінімді саралау, презентацияға жобаларды іріктеу, питч-презентация, комиссияның шешімі және соңында үміткерлермен шарт жасасу кіреді. Жеңімпаздар үш жыл көлемінде өз табыстарынан қосымша 1%-ды Astana Hub-тың еншісіне аударуға, сондай-ақ басқа стартаптарды дамытуға көмектесуге міндетті болады.
Тәуелсіз сарапшылардан жасақталған комиссия MVP, Product-Market Fit және Scale сынды бірнеше кезеңде 35 үздік жобаны іріктейді. Бұл ретте IT саласына қатысты кез келген технологиялық және инновациялық жаңа жоба Astana Hub басымдық берген қызмет түрлеріне сәйкес келсе, аталған бағдарламаға қатысуға құқылы.
Ұйымдастырушылардың айтуынша, Seed Money бағдарламасы IT-өнімдерінің экспортын ынталандырып, тәжірибе алмасуға және үздік тәжірибелерді енгізудің нәтижесінде жергілікті кадрларды дамытуға оң әсерін тигізеді.
«Қаржыландыру revenue share (табысты бөлу) моделі негізінде жүзеге асырылады. 3 жыл ішінде бағдарламаға қатысушы әр тоқсан сайын түскен табыстың 1% мөлшеріндегі қаражатты төлеуге міндетті. Бұл өз кезегінде алдағы стартапшылардың жаңа легін қаржыландыруға жол ашады», деді Astana Hub-тың бас директоры Мағжан Мәдиев.
Өтінімдерді қабылдау 2 тамызда басталып, аяқталу мерзімі стартаптың даму сатысына байланысты болады.