ҚАРАҒАНДЫ ТЕАТРЫ ОРАЛДА

Бұл күндері Батыс Қазақстан облыстық қазақ дра­ма театрының ғимаратында Қарағанды облыстық С.Сейфул­лин атындағы қазақ драма театрының гастролі өтуде. Шалқар көлі жағасында дүниеге келіп, Орал қала­сындағы С.Сейфуллин атындағы №11 мектепте білім алған, Қарағанды театрының бүгінгі директоры әрі көр­­­кем­дік жетекшісі, Қазақстанның еңбек сіңірген әртісі, Мемлекеттік сыйлықтың лауреаты Кеңес Жұма­бековтің айтуынша, театр Ұлы Жеңістің 65 жылдығы­на орай осының алдында үлкен құраммен Атырауда болса, енді Оралға жол түсіп отыр. Қарағанды театрының 78 жылдық тарихы бар. Мұнда кезінде Қазақстанның халық әртістері Жәмилаш Шашкина, Әсия Аблаева, Қараған­дыбек Сатаев сынды сахна саңлақтары еңбек еткен. Одан кейін де бірнеше буын алмасқан театр тек Қазақ­стан ғана емес, алыс-жақын шет елдерде де өнер көрсетіп келеді. Гастроль шымылдығы Мұхтар Әуезовтің “Айман-Шолпан” музыкалық комедиясымен (режиссері – Есмұқан Обаев) ашылды. Премьерасы өткеніне екі жыл тола қой­маған спектакльде Айман бейнесін Бота Мақсұтова сомда­са, Шолпанды тағы бір жалынды жас әртіс Баян Әу­кешова шығарды. Қойылымдағы алуан түрлі кейіпкер­лерді Думан Еспаев, Қайрат Кемалов, Сламбек Жұмағали, Нұржібек Жансүгірова және басқалар сахана төрінен көрсетті. Оралдықтарды қарағандылықтар бұдан кейін де М.Хасеновтің “Hі-Fі махаббатымен”, Әлімбек Оразбековтің “Бір түп алма ағашымен” Сұлтанәлі Балғабаев­тың “Ғашықтар болмайтын ғасырымен” Сәкен Жүнісовтің “Жаралы гүлдерімен” және Оспанхан Әубәкіровтің балаларға арнап жазған “Қожа мен спорт” ертегісімен сусындатты. Темір ҚҰСАЙЫН, ОРАЛ.