КӨРМЕ КЕРЕМЕТТЕРДІ КӨРУГЕ ШАҚЫРАДЫ

Қазақстан Үкіметінің басшысы Кәрім Мәсімов Шанхайдағы ЭКСПО-2010 Дүниежүзілік көрмесінің ашылу салтанатына қатысты Қазақстан Республикасының Премьер-Министрі Кәрім Мәсімов бас­таған еліміздің делегациясы 29 сәуірде Қытай Халық Республикасының Шанхай қаласына келді. Кеше мұнда биылғы жылғы халықаралық дәрежедегі ең айтулы оқиғалардың бірінен саналатын Шанхайдағы ЭКСПО-2010 Дүниежүзілік көрмесінің ашылу салтанаты болып өтті. Дүниежүзілік көрме – бұл адам­заттың ақыл-ойы мен шығар­ма­шылық шабытының шырқау ор­талығы болып табылады. 1851 жылы Лондонда алғаш рет дүние­жүзілік өнеркәсіп көрмесі өткізілді. Содан бергі өткен жылдар ішінде бұл халықаралық бастама әлемдегі экономикалық, ғылыми-техноло­гия­лық және мәдени жетістіктерді паш ететін орталыққа айналды. Сонымен бірге, дүниежүзілік көрме тарихи тәжірибелерді таныстыра­тын, инновациялық идеялармен алмасатын, әлем халықтарының бо­лашаққа деген бірлігін шыңдай­тын тұғырлы орын болып келеді. ҚХР 2010 жылғы Дүниежүзілік көрме орталығы ретіндегі жетіс­тікке мемлекеттегі соңғы жылдары жүргізілген тиімді реформалардың, осы елдегі жылдан жылға нығайып келе жатқан бүкіл әлемге ашықтық саясатының арқасында, осыған байланысты халықаралық қоғам­дас­тықтың қолдауы мен сенімінің нәтижесінде қол жеткізді. Кеше салтанатты жағдайда “Тамаша қала – тамаша өмір” ұранымен ашылып отырған ЭКСПО-2010 Дүниежү­зі­лік көрмесі – ХХІ ғасырдағы қала өмірінің барлық қуаты мен жетіс­тік­терін паш еткен, сондай-ақ, әлем қалаларының даму келешегін айқындайтын маңызды шара. Са­рапшылардың болжамы бойынша, биылғы жылдың соңына таман Жер шарындағы адамдардың 55 пайызы қалалық тұрғындар болып есептелмек. Сондықтан қала өмірі­нің болашағы бүкіл планета тұр­ғын­дарын, даму деңгейіне қарамас­тан барлық мемлекеттерді толған­ды­рып отырған тақырып екендігі даусыз. Ендеше, Шанхайдағы ЭКСПО-2010 көрмесі салтанат құратын 184 күн бойы барлық әлем назары Аспанасты еліне ауатын­ды­ғы да рас. Міне, сондықтан да болар ҚХР биылғы Дүниежүзілік көрмені өт­кізуге ерекше шығармашылық ізде­ніс­пен, барынша дайындықпен кел­ген екен. Ақиқатында Аспа­нас­ты елі ауқымды халықаралық ша­ра­ларды өткізуде алдына жан сал­майтын сияқты. “Тамаша қала – тамаша өмір” ұранымен өтіп жат­қан ЭКСПО-2010 Дүниежүзілік көр­месі қаланы кесіп өтетін Хуанпу өзенінің қос жағалауында, Наньпу және Лупу көпірлерінің ортасында орналасыпты. Көрменің жалпы аума­ғы 5,28 шаршы шақырымды алып жатыр. Оның ішінде ЭКСПО-2010 көрмесінің 3,93 шаршы ша­қырымы Шанхай қаласының Пудун ауданында, 1,35 шаршы шақырымы Пуси ауданында қоныс тепкен. Бұл “Тамаша қала – та­маша өмір” Дү­ние­жүзілік көрме­сін­де әлемнің 200 мемлекетінің және халықаралық ұйымдарының па­виль­ондары орна­ласқан. Көрме Аспанасты елінің көне де атақты қаласы Шанхайда үсті­міздегі жыл­дың 1 мамыры мен 31 қазаны күн­дері аралығында өтетін болады. Шанхайдағы ЭКСПО-2010 Дү­ние­жүзілік көрмесіне қатысатын Қазақстан делегациясын бастап келген Премьер-Министр Кәрім Мәсімовті кеше Қытай Халық Рес­публикасының Төрағасы Ху Цзинь­тао қабылдады. Екіжақты кездесу барысында тараптар көршілес екі елдің экономикалық және ынты­мақ­тастық байланыстарына жоғары баға беріп, алдағы уақыттағы дамы­ту перспективаларын тілге тиек етті. ҚХР басшысы біздің еліміздің дағдарыстан кейінгі даму қарқы­ны­ның жоғары деңгейін, Елбасының тиімді реформаларының арқасында биылғы жылдың І тоқсанда эконо­ми­калық жетістіктерге жеткендігін атап көрсетті. Одан кейін Қазақ­стан Республикасы Үкіметінің бас­шысы Шанхайдағы “Хуавэй” ғы­лы­ми-зерттеу орталығы корпо­ра­циясында болып, әлемге танылған орталықтың қызметімен танысып, басшыларымен пікір алмасты. Осы күні кешкісін Премьер-Министр Кәрім Мәсімовтің жетек­шілігімен келген Қазақстан Респуб­ли­касының делегациясы ЭКСПО-2010 Дүниежүзілік көрмесінің ашылу салтанатына қатысты. Төрт­күл дүниенің назарын аударған көр­менің ашылу салтанаты Аспа­н­ас­ты еліне тән отшашулармен өр­нек­теліп, ұлан-асыр мерекелік ша­ра­ларға ұласты. Екі сағатқа созыл­ған ашылу салтанатында Дүние­жүзі­лік көрмеге қатысушы әлем қалаларының озық жетістіктері де бар қырынан көрініс берді. ЭКСПО-2010 Дүниежүзілік көр­месінен кейін “Шанхай дек­ла­рациясы” қабылданатын болады. Қытай елі осы көрменің жұмысы барысында атқарылған шаралардың дүниежүзілік көрмелер тарихында бетбұрыс кезең болатындығына ерек­ше үміт артады. “Шанхай дек­ларациясы” арқылы Аспанасты елі осы көрмеге қатысушылардың барлық тәжірибесін жинақтап, әлем қалаларының даму тарихында жаһан жұртшылығына теңдесі жоқ рухани байлық қалдырмақ. Сон­дық­тан да ҚХР “Тамаша қала – тамаша өмір” ұранымен өтіп жат­қан Шанхайдағы ЭКСПО-2010 көр­месінің ашылу салтанатына да, ұйымдастырылып, өткізілуіне де айрықша мән беріп отыр. Дүние­жү­зілік көрменің ресми түрде жұ­мыс істей бастаған алғашқы күнін­де-ақ өткізілген ауқымды шаралар­дан осыны айқын аңғаруға болады. Кеше Үкімет басшысы Кәрім Мәсімов Дүниежүзілік көрмедегі Қазақстан павильонының ашылу салтанатына арналған шараларға қатысты. “Тамаша қала – тамаша өмір” ұранымен өтіп жатқан көр­ме­дегі Қазақстан павильонының та­қырыбы – “Астана – Еуразия жүре­гінде”. ЭКСПО-2010 Дүние­жүзілік көрмесінің негізгі мақсаты болашақ қаласының модельдері мен тұжырымдамалық шешімдерін ұсыну болса, “Астана – Еуразия жүрегінде” атты Қазақстан па­вильон­ының негізгі мақсаты ең жас және ғарыштық қадаммен дамыған әлемдегі елордалардың бірінен саналатын Астана қаласының тәжірибесі арқылы Тұңғыш Пре­зидентіміз, Астананың авторы Нұр­сұлтан Назарбаевтың сара басшы­лы­ғымен дамып келе жатқан еге­мен еліміздің тәуелсіздік жыл­да­рын­дағы қол жеткізген жетістік­терін төрткүл дүниеге таныту бо­лып отыр. Қазақстан павильоны­ның ашылуынан кейін Үкімет бас­шысы еліміздің БАҚ өкілдеріне сұхбат беріп, Дүниежүзілік көр­медегі Қазақстан павильонының ашылу маңызына тоқталды. Бұдан бұрын еліміз 2005 және 2008 жылдары өткен дүниежүзілік көрмелерге қатысқанда, павильон­дар­ды жалға алған болатын. Шан­хайдағы ЭКСПО-2010 көрмесінде алғаш рет Қазақстан Республикасы көрмеге әкелген жетістіктерін паш ететін павильонды іргетасынан бас­тап өз күшімен салып шыққан. Қа­зақстан павильонының алып жат­қан аумағы да ауыз толтырып ай­туға тұрарлық. Ол – 1000 шаршы метр аумақты алып жатыр. Қа­зақ­стан павильонының дәл ортасында ел болашағының символы Астана­дағы “Бәйтерек” монументінің жар­қыраған биік макеті орналас­тырылған. Ол атшаптырым аумақ­ты алып жатқан Қазақстан павиль­оны­ның түпқазығы іспетті. Біздің көрмедегі павильонымыз ЭКСПО-2010 Дүниежүзілік көрмесінің беделді аймақтарының бірі “А” секторына орналасыпты. Біздің па­вильонның қос қанатында Оңтүстік Корея және Жапония мемлекет­те­рінің павильондары қоныс тепкен. Үкімет басшысы Жапония, Ресей және ҚХР-дың павильондарын аралап көрді. Дүние жүзі қалаларының бүгінгі және болашақ дамуының жетістік­терін паш еткен ЭКСПО-2010 көр­ме­сі барлық әлем назарын өзіне аударған. Осы бір жаһандық оқи­ғада Қазақстанның көрмедегі па­вильонының жұртшылыққа тигіз­ген әсері ерекше болды. Дүниежү­зі­лік көрмедегі еліміздің жетіс­тік­тері мен Қазақстан павильонының ашылу салтанаты туралы алдағы мақаламызда толығырақ баян­дайтын боламыз. Жылқыбай ЖАҒЫПАРҰЛЫ – Шанхайдан.