Қоғам • 31 Тамыз, 2021

Тұрмыстық зорлық-зомбылық құрбандарына қандай көмек көрсетіледі?

54 рет көрсетілді

Алматы қалалық Әлеуметтік әл-ауқат басқармасының басшысы Назира Тоғызбаева онлайн брифинг барысында қалада тұрмыстық зорлық-зомбылық мәселесі жайын қозғады, деп хабарлайды Egemen.kz.

Алматыда зорлық-зомбылықтан зардап шеккен әйелдерге көмек көрсетілетін «Жан Сая» дағдарыс орталығы жұмыс істейді. 2017 жылы ашылған орталыққа биыл 75 әйел мен 157 бала өтініш берген.

«Мұнда зардап шеккендерге баспана, құқықтық, психологиялық және әлеуметтік қолдау көрсетіледі. Орталық қабырғаларында балаларға арналған түрлі іс-шаралар өткізіледі. Сондай-ақ қалада тұрғылықты жері жоқ адамдар үшін құрылған «Пана» әлеуметтік қызмет көрсету орталығы жұмыс істейді. Жыл басынан бері 466 адамға әлеуметтік көмек көрсетілді, олардың барлығы уақытша тұрғын үймен қамтамасыз етілді», деп түсіндірді басқарма басшысы.

Орталық мамандары зардап шеккендердің құжаттарын қалпына келтіруге көмектеседі.

«Алматыда жалғызбасты зейнеткерлер, мүгедектер, зейнеткерлік жастағы ерлі-зайыптылар үшін еліміздегі ерекше «Қамқор» әлеуметтік үйі жұмыс істейді. Бүгінгі таңда 50 адам әлеуметтік үйді пана етуде. Туыстарының қарауынсыз қалған тұрғындар пәтерлерін мемлекет меншігіне өткізіп, осы үйге көше алады», деді Назира Тоғызбаева.

Соңғы жаңалықтар

Ұқсас жаңалықтар