Курстарды оқушылар таңдайды

Ал енді дәстүрлі «Алғашқы қоңырау» салтанаты тек бірінші сынып оқушылары үшін ғана өтеді. Бұл күні балдырғандарға Ахмет Бай­­тұр­сынұлының әдістемесі негізін­де әзір­ленген «Әліппе» және «Букварь» оқулық­тары табыс етіледі. Сонымен бірге, 1 қыркү­йек­те барлық мек­т­ептерде «Тәуел­сіздік жетістік­тері» та­қы­рыбында сынып сағаттарын өткізу жоспарланған.

Ал ең басты жаңалық – Қарағанды облысында жаңа оқу жылы дәстүрлі форматта басталмақшы. Оқушылардың мектеп формасын киюі міндетті емес: классикалық және іскерлік үлгідегі киімге рұқсат етіледі.

Биылдан бастап 5-8-сынып оқушы­лары үшін «Парасаттылық және этика», «Экология», «Эмо­циялық ақыл-ой және сыни ойлау», «Медиа­сауаттылық» сынды жаңа курстар енгізілмек. Бұл жерде таңдауды оқушылардың өздері жасайды.

Әлеуметтік осал отбасылардың балаларына деген қамқорлық биыл да жалғасын табады. Бұл мақсатта жалпыға міндетті оқу қоры есебінен 22 мыңнан астам оқушы мектеп формасымен және керек-жарақтармен қамтамасыз етіледі. Сонымен қатар 16 мыңнан астам оқушыға тегін түскі ас беріле­ді. Бюджеттен барлық бас­тауыш сы­нып оқушыларын тегін ыстық тамақ­пен қам­тама­сыз етуге қаражат бөлінді. Ал «Мектепке жол» республикалық қайырым­дылық акция­сы аясында әлеуметтік қолдауға мұқтаж 3 899 балаға көмек көрсетілген.

Биыл облыстағы колледждер де дәстүрлі форматқа оралатын болды. Оқу-өндірістік шеберханалар мен зертханалар жұмысын қайта бастайды. Студенттер жатақханаға орналастырылады.

Облыстық білім басқармасының басшысы Гүлсім Қожахметова барлық білім беру ұйымдары Ashyq жобасының қатысушылары болатынын айтады. Атап айтқанда, барлық санитарлық талаптар мүлтіксіз орындалатын болады. Оқу басталғанда кабинеттік жүйе алынып тасталады және түрлі сыныптар үшін үзіліс әртүрлі уақытқа бөлінеді. Сабақ­тарды бірнеше ауысыммен өткізу де қауіп­сіздікті сақтау шараларының нәтижесінде туындаған.

Жаңа оқу жылында ұстаздар қауымының вакцина алу мәселесі де жіті назарда болмақ. Білім басқармасы берген ресми мәліметке сенсек, қазіргі уақытта аталған ведомство қыз­меткерлерінің 90%-дан астамы коронавирус инфекциясына қарсы вакцина салдырған екен.

Қарағанды облысы