Елімізде саяси реформалар іс-жүзіне асырыла береді. Ауыл әкімдерінің сайлауы аяқталғаннан кейін, 2024 жылы аудан әкімдерінің сайлауы өтеді. Әйелдер мен жастарға арналған 30-пайыздық квотаны депутаттық мандаттарды бөлген кезде сақтау заң бойынша талап етіледі. Мүмкіндігі шектеулі жандарға партиялық квота белгілеу айтылды. Бұл – өте өзекті мәселе. Осы проблеманы көптеген азамат көтерген болатын.
Мемлекеттік тіл жөнінде де тұщымды ойлар айтылды. Қазақстанда мемлекеттік тіл – қазақ тілі. Мемлекеттік тілді біліп, меңгеру – әрбір қазақстандықтың парызы және міндеті. Мемлекет қазақ тілінің қолдану аясын арттыруды жалғастыра береді. Бұл қадамдар диалог пен келісім режімінде іс-жүзіне асырылуға тиіс.
Бұл Жолдауды пандемия жағдайында халқымыздың әлеуметтік жағдайын тұрақты ұстап тұрып, жақсартудың төте жолы деуге болады. Менің ойымша, Жолдаудағы жаңалықтың бірі – ең төменгі жалақы мөлшерінің артуы. Ол 2022 жылдың 1 қаңтарынан бастап 60 мың теңгеге дейін өседі. Бұл шара халқымыздың 2 млн азаматының тұрмыс жағдайын жақсартады.
Мәдениет, мұрағат саласы қызметкерлерінің, кітапханашылардың жалақысы 2025 жылға дейін жыл сайын 20 пайызға өседі. Азаматтық қызметшілердің жалақысын арттыру да өте маңызды. Өйткені мемлекеттік қызметшілердің жалақысы көбейгенде бұл сала мамандарының еңбекақысы көтерілмей қалып отырды. Енді осы күнге де жеттік, азаматтық қызметкерлердің жалақысы өспек.
Елімізде 6,5 млн адам – жалдамалы қызметкерлер. Осы азаматтардың жалақысын жүйелі түрде арттыру үшін бизнеске ынталандыру шаралары жасалады. Бұл да халқымыздың әлеуметтік стандарттарын арттырып, дамыту үшін маңызды қадам.
Басты мәселе – саяси плюрализм, қоғамдық реформалар салмақты-салиқалы, эволюциялық түрде жүруі керек. Мемлекет басшысы Қасым-Жомарт Тоқаев әлеуметтік әділеттілік принциптері бұлжымас бағытымыз екендігін тағы бір қуаттап берді.
Ерлан САИРОВ,
Мәжіліс депутаты