Мәжіліс Төрағасы Нұрлан Нығматулин бастаған парламенттік делегация Австрия астанасы Венада өтіп жатқан парламент спикерлерінің бесінші Дүниежүзілік конференциясына қатысуда.
Мәжіліс Спикері көпжақты ынтымақтастықты нығайту, бейбітшілік пен тұрақты дамуды қамтамасыз ету үшін парламенттік қызмет тақырыбына арналған интерактивті жалпы пікірталастарда сөз сөйледі.
Сонымен қатар Нұрлан Нығматулин бүгінгі таңда Қазақстанда болып жатқан және еліміздің тұрақты дамудың халықаралық қағидаттарына сәйкес дамуына мүмкіндік беретін процестер туралы айтып берді.
«Тиімді мемлекет пен әділ қоғам құрудың тұжырымдамалық негіздерін Қазақстанның Тұңғыш Президенті Нұрсұлтан Назарбаев қалаған болатын. Бүгін Президент Қасым-Жомарт Тоқаев саяси бағыттың сабақтастығын қамтамасыз етеді», деді Мәжіліс Төрағасы.
Нұрлан Нығматулин қазақстандық қоғам өмірінің барлық салаларына қатысты ауқымды жүйелі реформалар туралы айта кетіп, азаматтық қатысуды кеңейтуге және қоғамдық бақылауды күшейтуге, сондай-ақ Мемлекет басшысының бастамаларын заңнамалық қолдауға назар аударды.
«Парламент реформаларды дер кезінде заңнамалық сүйемелдеуді қамтамасыз ете отырып, бұл үдеріске белсенді қатысуда. Сайлау заңнамасы мен сот жүйесін жетілдіретін маңызды заңдардың тұтас пакеті қабылданды. Өзгерістер саяси партиялар, бейбіт жиналыстар, жергілікті өзін-өзі басқару туралы заңнамалық актілерге де қатысты болды», деді Мәжіліс спикері.
Өз сөзінде Нұрлан Нығматулин Қазақстанның жаһандық және өңірлік деңгейлерде бейбітшілік пен қауіпсіздікті қамтамасыз етуге қосқан үлесіне ерекше назар аударды.
«Жаңа қауіп-қатерлер аясында Қазақстан Президенті Қасым-Жомарт Тоқаев БҰҰ Қауіпсіздік Кеңесіне есеп беретін биологиялық қауіпсіздік жөніндегі халықаралық агенттік құруды ұсынды. Бұл жаңа мамандандырылған құрылым биологиялық қауіптердің алдын алуға тікелей қатысты болуы мүмкін. Біз әріптестеріміздің осы маңызды бастаманы белсенді қолдайтынына сенеміз», деп атап өтті Нұрлан Нығматуллин.
Халықаралық күн тәртібіндегі Ауғанстандағы бейбітшілік пен қауіпсіздікті қалпына келтіру сияқты өзекті мәселе туралы айта келіп, Нұрлан Нығматулин бүгінгі таңда ең маңыздысы – Ауғанстандағы гуманитарлық және азық-түлік дағдарысына жол бермеу екенін атап өтті. Ол, сондай-ақ қазіргі уақытта Қазақстан Президентінің шешімі бойынша Ауғанстанға жәрдемдесу жөніндегі БҰҰ миссиясы біздің елімізде уақытша орналастырылғанын еске салды.
Бесінші Дүниежүзілік парламент спикерлерінің конференциясы коронавирустық пандемия басталғаннан бері тікелей эфирде өткізіліп келе жатқан алғашқы ауқымды парламентшілер форумы болды. Венадағы конференцияны Парламентаралық одақ, БҰҰ-мен өзара іс-қимыл кезінде Австрия Парламенті ұйымдастырды. Әлемнің 90-нан астам елінің парламент спикерлерінің назарында - пандемиямен күресу және Сovid-19-дан кейін қалпына келтіру жөніндегі жаһандық шараларды қоса алғанда, шұғыл халықаралық парламенттік іс-қимылды талап ететін басымдықтар, климаттың өзгеруі және экологиялық тұрақтылықты қамтамасыз ету мәселелерін шешу, дезинформацияға қарсы іс-қимыл, жастардың саясатқа қатысуы, гендерлік теңдік бар. Қазақстандық парламентшілер делегациясының құрамында Сенат пен Мәжіліс депутаттары бар.
