Кездесу барысында Президенттің Жолдауы мен берген тапсырмаларын іске асыруға бағытталған бірқатар заң топтамасының әзірленіп жатқаны жөнінде мәлімет берілді.
Парламенттің жоғарғы Палатасының төрағасы алдағы сессия аясында сенаторлар Үкіметпен және Мәжіліс депутаттарымен бірлесіп, әйелдер мен жастар үшін 30 пайыздық квотаны бекіту бөлігінде сайлау заңнамасын өзгерту бойынша жұмыс істейтін болады деп хабарлады.
Сонымен қатар, «Әлеуметтік кодекс», «Өнеркәсіп саясаты туралы», «Кәсіби біліктілік туралы», «Жеке қосалқы шаруашылықтар туралы» және басқа да заңдарға өзгертулер мен толықтырулар енгізу міндеті тұр.
Мәулен Әшімбаевтың айтуынша, Сенат депутаттары Мемлекет Басшысының тапсырмаларын орындауға бағытталған бірқатар бастамашыл заң жобаларын дайындады. Атап айтқанда, «Адам құқықтары жөніндегі уәкіл туралы» заң жобасы жоспарлануда, сонымен қатар ғылыми кадрлардың жағдайын жақсарту және олардың әлеуметтік қорғалу кепілдіктері туралы заңнамасына, Салық кодексіне өзгертулер енгізу көзделуде. Сондай-ақ жайылымдық жерлерді басқаруды және пайдалануды реттейтін бірқатар түзетулер әзірлену үстінде.
Қасым-Жомарт Тоқаев «Халық үніне құлақ асатын мемлекет» тұжырымдамасын іске асыру аясында қабылданатын заң жобаларының барлық нормаларын талқылау және пысықтау процесіне азаматтық қоғам мен сарапшыларды кеңінен тарту қажеттігін атап өтті.
Кездесу соңында Президент парламенттік дипломатияның әлеуетін одан әрі іске асыруға қатысты бірқатар міндеттер қойды.
Сондай-ақ, Мемлекет басшысы 2022 жылы Әлемдік және дәстүрлі діндер көшбасшыларының VII съезіне дайындықты бастау туралы тапсырма берді.
