Еуропалық сарапшылар ІІМ-нің жемқорлыққа қарсы жұмысына баға берді

Нұр-Сұлтан қаласында мемлекеттің сыбайлас жемқорлыққа қарсы стандарттарды сақтауын мониторингтеу бойынша бағалау раунды шеңберінде ҚР ІІМ делегацияларының және Еуропа Кеңесінің Сыбайлас жемқорлыққа қарсы мемлекеттер тобының (ГРЕКО) кездесуі өтті.

Мақсаты – Министрліктің сыбайлас жемқорлыққа қарсы іс-қимыл саласындағы Еуропа Кеңесінің стандарттарына сәйкестігін бағалау. Қазақстан ІІМ-нің атынан ІІМ Өзіндік қауіпсіздік департаментінің бастығы Арман Саданов, құрылымдық бөлімшелердің басшылары мен ведомство қызметкерлері қатысты.

Арман Саданов сыбайлас жемқорлыққа қарсы күрес саласында шетелдік әріптестер жинақтаған озық тәжірибені қолдануға және қабылдауға дайын екенін атап өтті.

«Халықаралық ынтымақтастық – біздің жұмысымыздың негізгі бағыттарының бірі. Мемлекеттердің өзара іс-қимылы сыбайлас жемқорлыққа қарсы бірыңғай стандарттарды белгілеуге, азаматтардың, заңды тұлғалардың және мемлекеттің құқықтары мен заңды мүдделерін тиімді қорғауға ықпал ететіні сөзсіз», деді А. Саданов.

Сонымен қатар ішкі істер органдарында сыбайлас жемқорлыққа қарсы нормативтік құқықтық базаны дамыту туралы айтты.

«Сыбайлас жемқорлықтан туындайтын қатерлердің жаһандық сипатын түсініп, сыбайлас жемқорлыққа қарсы іс-қимылдың барлық ықтимал шараларын қабылдап жатырмыз. Нәтижесінде, соңғы үш жылда қызметкерлер жасаған сыбайлас жемқорлық қылмыстарының саны 43%-ға, жыл басынан бері қылмыстардың жалпы саны 15%-ға, оның ішінде сыбайлас жемқорлық 8%-ға қысқарды», деді ол.

Сондай-ақ сарапшыларға қазақстандық полицияны ауқымды реформалау, адам құқықтары жөніндегі халықаралық стандарттарды заңнамаға енгізу, сондай-ақ сыбайлас жемқорлыққа қарсы іс-қимыл бойынша жүргізіліп жатқан жұмыстар туралы ақпараттар берілді.

Кездесу барысында Қазақстан тарапының өкілдері ГРЕКО сарапшыларының ішкі істер органдарының функциялары мен міндеттеріне, оның өкілеттіктері мен бағыныстылығына, полицейлердің кәсіби даярлығына байланысты сұрақтарына жауап берді. ГРЕКО мамандары Қазақстан ІІМ-нің сыбайлас жемқорлық тәуекелдері мен көріністеріне қарсы іс-қимылға, сондай-ақ олармен күресу үшін бірлескен тиімді шешімдерді әзірлеуге қосқан үлесін атап өтіп, ведомство өкілдеріне ұсынылған ақпарат үшін алғыс білдірді.

Анықтама: Сыбайлас жемқорлыққа қарсы елдер тобы 1999 жылы осы ұйымға кірген елдерде Еуропа Кеңесінің сыбайлас жемқорлыққа қарсы стандарттарын мониторингтеу үшін құрылған. ГРЕКО-ның міндеті – осы саладағы Еуропа Кеңесінің стандарттарын сақтау мониторингі арқылы сыбайлас жемқорлыққа қарсы күрес жөніндегі жұмысты ұлттық деңгейде жетілдіру. ГРЕКО құрамына жалпы халқы 1,2 миллиардқа жуық Еуропа, Америка және Азия мемлекеттері кіреді. 2020 жылғы 1 қаңтарда Қазақстан ГРЕКО-ға 50-ші мүше мемлекет болды. Ағымдағы жылдың 7-10 қыркүйекте Қазақстан алғаш рет ГРЕКО тарапынан мемлекеттің сыбайлас жемқорлыққа қарсы стандарттарды сақтауы бойынша бағалаудан өтті.