Чемпионатқа үлкен үміт артамыз

Жерлестерімізге өз тобынан іркілмей шығу айтарлықтай қиын­дық туғызбайды деген ойда­мыз. Өйткені Қазақстан құра­масының өзге командаларға қа­рағанда халықаралық арена­да қол жеткізген табысы әлдеқай­да қо­мақты. Бәлкім, Литва мен Коста-Рика біраз тіресуі мүмкін. Балтық жағалауы өкілдері бұған дейін пәлендей белестерді бағын­дырмағанымен, жарыс қожа­йын­дары ретінде өз көрер­мен­дері­нің көз алдында жандарын салып айқасатыны анық. Коста-Рика – өз құрлығындағы бе­делі бар командалардың бірі. Олар 2000 жылы КОНКАКАФ біріншілігінің жеңімпазы атанса, 2004 жылы қола медальды иеленді. Әлем чемпионатында төрт рет өнер көрсетіп, 2016 жы­лы 1/8 финалға дейін жетті. Ал Ве­несуэла құрамасында ондай та­быстың бірде-бірі жоқ.

Қазақстан үшін бұл – үшінші әлем чемпионаты. Алғашында біз Азия құрлығындағы іріктеу сынынан сүрінбей өтіп, 2000 жылы Гватемалада өткен әлемдік додаға қатыстық. Бұл сапар біздер үшін сәтсіз аяқталды. Тұсаукесер кездесуде Бразилия тас-талқанымызды шығарды – 1:12. Одан кейін алаң иелеріне есе жібердік – 5:6. Соңғы ойында Португалиядан ойсырай ұтылдық – 2:6. Десек те бұл нәтижеге бола қазақстандық жанкүйерлер қатты күйіне қойған жоқ. Себебі ол кездері елімізде футзал енді-енді ғана еңсе тіктеп келе жатқан. Ғасырлар тоғысында жасақталған команда сапында кілең өз өрендеріміз ойнады. Сон­дықтан да аса маңызды жа­рысқа жолдама алудың өзі үлкен жетістік саналды.

Қазақстан құрамасы екінші рет 2016 жылы Колумбияда шы­мылдығы түрілген жарысқа қа­тысты. Ол кезде УЕФА-ға өт­кен­біз. Алғашқы айналымда Ар­ген­тина­ға тап келдік. Америка ку­богын­да 10 рет (2 алтын+5 күміс+3 қола) жеңіс тұғырына көтерілген командамен тең дәре­жеде ойна­дық. Алайда 20-минут­та Аламиро Вапораки соққан жалғыз гол бә­секе тағдырын шеш­ті – 0:1. Бір айта кетерлігі, сол жылы аргентиналықтар әлем чемпионы атанды. Келесі айна­лымда Коста-Рикамен күш сы­настық. Бұл жолы айтулы жа­рыс тарихындағы алғашқы жеңі­сімізге қол жеткіздік. Дуглас, Тако және Лео соққан үш допқа қарсыластар командасы бір ғана голмен жауап бере алды – 3:1. Одан кейін Соломон аралдарын сан соқтырдық. Бұл бәсеке 10:0 есебімен аяқталды.

Жерлестерімізге плей-офф ке­зе­ңінің алғашқы айналымын­да Испания құрамасымен күш сынасуға тура келді. Екі дүркін әлем чемпионы, үш дүркін вице-чемпион және бір мәрте қола жүлдегер деген дардай ата­ғы бар азулы қарсыласқа біз­дің жігіттердің әлі жетпеді. Көрер­мендер көңілінен шыққан тартысты ойын 5:2 есебімен испа­ниялықтардың пайдасына ше­шілді. Жерлестеріміздің арасынан Шыңғыс Есенаманов пен Дәурен Нұрғожин нысананы дәл көздеді.

Міне, енді әлемдік доп додасына Қазақстанның футзалшылары үшінші мәрте қатысқалы отыр. Ұлттық командамыздың бас бапкері Рикардо Кака Балтық жағалауындағы жарыста мына шә­кірттеріне сенім артып отыр: Қақпашылар – Игита («Қайрат») мен Рауан Атантаев («Атырау»). Қапталдағы ойыншылар – Тайнан («Эль-Посо», Испания), Дуглас, Дәурен Нұрғожин, Шыңғыс Есенаманов, Альберт Акбаликов, Біржан Оразов, Дәурен Тұрсағұ­лов («Қайрат»), Азат Валиуллин («Ухта», Ресей), Арнольд Кнауб, Нұрбек Қарағұлов («Ақтөбе»), Болат Сарбасов, Жомарт Тоқаев («Атырау»), Төрехан Досов («Бәй­терек») және Ақеділ Мадияров («Липецк», Ресей).

Сондай-ақ топтық турнирлерде мына командалар өзара күш сынасады: В тобы – Өзбекстан, Гватемала, Ресей және Мысыр. С тобы – Таиланд, Португалия, Марокко және Соломон аралдары. D тобы – Панама, Чехия, Вьетнам және Бразилия. Е тобы – Ангола, Жапония, Парагвай және Испания. F тобы – Аргентина, АҚШ, Сербия және Иран.  Литвадағы доп додасы Виль­нюстегі «Сименс Аре­на» (10 мың көрерменге есеп­телген) мен Кау­настағы «Жаль­гирис Аренада» (13 807) және Клай­педа­­дағы «Швитуре Аренада» ­
(6 200) өтеді.

Жарыстың басты фавориттері ретінде Бразилия, Испания және Аргентина құрамалары саналады. Бұл болжам негізсіз емес. Егер өткенге зер салсақ, футзалдан әлем чемпионаты небәрі сегіз мәрте ғана ұйымдастырылғанын байқаймыз. Осы жарыстарда бразилиялықтар бес рет (1989, 1992, 1996, 2008, 2012 жылдары) бас жүлдені олжаласа, испаниялықтар екі рет (2000, 2004 жылдары) дара шықты. Тағы бір алтын медаль (2016 жылы) аргентиналықтарға бұйырды. Олардың басты қарсыластары ретінде Италия мен Ресей аталуда. Өз тарихында Апеннин түбегінің түлектері үш рет (2004 жылы – күміс, 2008 және 2012 жылдары – қола) жүлдегерлер қатарынан көрінсе, көршілеріміз айтулы додада екі мәрте (1996 жылы – қола, 2006 жылы қо­ла) үшінші орыннан көрінді. Сон­дай-ақ соңғы бәсекеде қола ме­дальды қоржынға салған Испания фут­залшыларының да әлеуеті жо­ғары бағалануда. Ал біз, әри­не, Қазақстан құрамасына үлкен үмітпен қараймыз.