Жолдағы балалар қауіпсіздігі – жаңа оқу жылы бастала салысымен өзекті бола түсетін маңызды мәселенің бірі. Биыл онлайн жүйеден дәстүрлі форматқа көшкен оқу маусымы қарсаңында ел көлемінде «Абайлаңыз, балалар!» жедел-алдын алу іс-шарасы жүргізілді. ІІМ-нің мұрындық болуымен қолға алынған ауқымды операцияның таяуда бірінші кезеңі қорытындыланды. Іс-шара кезінде балалардың қауіпсіздігін қамтамасыз ету аясында ауқымды жұмыстар атқарылды. Соның ішінде, жолға жақын орналасқан білім беру ошақтарына 4 мыңнан астам тексеру жүргізілген. Мәселен, осындай тексеру іс-шаралары кезінде еліміздегі ең ірі мегаполис – Алматы қаласындағы 120 мектептің айналасында жасанды жол кедергілерінің жоқ екені анықталған. ІІМ Әкімшілік полиция комитеті төрағасының орынбасары Жандос Мұратәлиев мәлімдеуінше, тексеру жұмыстары кезінде анықталған кемшіліктерді жою үшін уәкілетті мекемелерге 2 мыңға жуық нұсқама берілген. «Білім беру мекемелерінің жанындағы 2 мыңға жуық жол белгісі жаңартылып, мыңға жуық жаяу жүргіншілер өткелі қайта жабдықталды. Сонымен қатар 20 мың метр жаяу жүргіншілер жолдары салынып, 26 мың метр жол жарықтандырылды», дейді комитет өкілі.
Балалардың қатысуымен болатын жол-көлік апаты өткен жылмен салыстырғанда 33 пайызға ұлғайғанын мәлімдеген ІІМ өкілі қаралы санның ұлғаюына пандемияның да теріс ықпалы тигенін жасырмады.
«Пандемия кезінде оқушылардың көпшілігі қашықтан оқу форматына көшірілгені белгілі. Осындай оқшаулау уақытында жеткіншектер мен жасөспірімдер арасында түсіндіру жұмыстарын жүргізу азайып кетті», деді бұл жайында Ж.Мұратәлиев. Жеткіншектер жарақат алатын жол апаттарының басты себептерінің тағы бірі – жаяу жүргіншілер жүретін жерден, жол қиылыстарынан өткен кезде қарапайым ережені сақтамау. Қоғамдық көлікті тоқтатамын деп, жолға жүгіріп шығатын жасөспірімдер де апатқа жиі ұшырайды.
«Өкінішке қарай, ата-аналардың көбі балаларды тасымалдау ережелеріне жүрдім-бардым қарайды. Әлі де көліктеріне балаларға арналған арнайы креслоларды орнатуды артық шығын санайтындар бар. Ал шындап келгенде, мұндай қауіпсіздік құрылғылары – автокресло, бустер, адаптерлерді қолданудың тиімділігі жоғары. Мәселен, 60 шақырым жылдамдықпен келе жатқан автокөлік апатқа ұшыраған жағдайда оның ішінде ешбір қауіпсіздік құрылғысыз отырған баланың жарақаттануы 30 пайызға арта түседі. Қатты соққының салдарынан өмір бойына мүгедек болып қалған жеткіншектер де аз емес. Сол себепті ата-аналарға балаларыңыз үшін қауіпсіздік мәселесіне немқұрайды қарамаңыз деп ескерткіміз келеді», деген полиция қызметкері балалардың жолдағы қауіпсіздігін қамтамасыз ету мәселесі қашанда өзекті болып қала беретінін айтты.
Жыл сайын өткізілетін «Абайлаңыз, балалар!» республикалық іс-шарасы биыл екі: 23-31 тамыз аралығында дайындық және 1-10 қыркүйек аралығында негізгі кезеңде өткізілді. Бірінші кезеңде мектеп, балабақша, оқу орталықтары маңындағы жаяу жүргіншілер өткелдері мен көшелердің сапасы, жол жүрісін ұйымдастыратын техникалық құралдардың жеткіліктілігі тексерілген. Тексеру жұмыстары нәтижесінде 18 мыңнан астам жол жүру қағидасын бұзу дерегі анықталып отыр. Оның ішінде ең көбі – 12 мыңы жолды белгіленбеген тұстан қиып өтуге қатысты болса, 2 мыңға жуық хаттама жаяу жүргіншілер жолағынан өту ережесін өрескел бұзғандардың үстінен толтырылған.
