Қарағанды қаласының Қазыбек би аудандық соты «Қарағанды облысы бойынша экология департаменті» РММ бас маманына қатысты алаяқтыққа әрекет ісі бойынша үкімін жариялады.
Сотқа дейінгі тергеп-тексеру органдары Департамент қызметкеріне ҚК-нің 24-бабының 3-бөлігі-190-бабының 3-бөлігі-1, 2-тармақтары бойынша алаяқтық жасады, яғни мемлекеттік функцияларды орындауға уәкілеттік берілген адам өзінің қызмет бабын пайдалана отырып адамдар тобының алдын ала сөз байласуы бойынша ірі мөлшерде алдау жолымен бөтеннің мүлкін ұрлады деген айып тақты.
Тексеру нәтижесінде экология департаментінің өкілі бір кәсіпорынға тексеру жүргізіп, онда қоршаған ортаға зиян келтірген экологиялық заңнама талаптарының бұзылғанын анықтағаны белгілі болды. Содан кейін эколог осы ЖШС техникалық директорымен бірлесіп, бұл жағдайда қалай пайда табуға болатынын жоспарлаған.
Осылайша, департамент қызметкері қорытындыда серіктестіктің экологияға келтірген залалының ең жоғары сомасын көрсетуге, ал кейіннен 10 млн теңге мөлшерінде сыйақы берсе, залал сомасын азайтуға болады деп көрсетуі тиіс болды. Осындай өтінішпен техникалық директор компанияның құрылтайшыларына барады.
Алайда ЖШС басшылығы пара беруден бас тартып, құқық қорғау органдарына хабар береді. Нәтижесінде, экология департаментінің бас маманы және ЖШС техникалық директоры ақша алу барысында қылмыс үстінде ұсталды. Сотталушының кінәсі куәгерлердің айғақтарымен, жасырын тергеу әрекеттерінің материалдарымен, сондай-ақ мойындау айғақтарымен дәлелденді. Бұл жағдайда прокурор айыпталушыны 4 жылға бас бостандығынан айыруды сұрады. Ал қорғаушы тарап жұмсақ үкім шығаруды өтінді.
Айта кету керек, Қылмыстық кодекске сәйкес, мұндай қылмыс үшін 7 жылға дейін бас бостандығынан айыру жазасы қарастырылған. Жазаны таңдау кезінде сот айпталушының шын жүректен кінәсін мойындағанын және өзі жалғыз кәмелетке толмаған бала тәрбиелеп отырғанын ескеріп, бұл жайттарды кінәні жеңілдететін мән-жай деп қарастырды.
Алайда кінәні ауырлататын мән-жай да жоқ емес – ол қызметкердің қабылданған антын бұзуы.
«Сот үкімімен К. үкімді орындау мерзімін 5 (бес) жылға дейін ұзарта отырып, бірақ бала он төрт жасқа толғанға дейін 3 жылға бас бостандығынан айырылады. Сондай-ақ сотталған адам өмір бойы мемлекеттік қызметте жұмыс істеу құқығынан айырылды. Ж-ға қатысты (ЖШС техникалық директоры) қайтыс болуына байланысты іс тоқтатылды», деп хабарлады Қарағанды қаласы Қазыбек би аудандық сотының баспасөз қызметі.
Сот үкімі заңды күшіне енген жоқ.
