МЫҢ ТАҒЗЫМ САҒАН, МАЙДАНГЕР!

Алматыда 28-пан­­­­филов­шы­лар паркінде Ауыл ша­руа­шылығы министр­лігінде қызмет еткен соғыс және тылдағы еңбек ардагерлеріне арналған жиында Отан үшін от кешкендердің  қайтпас қайсар­лы­ғы жөнінде кеңінен сөз болды. Салтанатты жиынға Ауыл шаруа­шы­лығы министрі Ақылбек Кү­рішбаев, министрліктің Орман және аңшылық шаруашылығы комитетінің төрағасы Ерлан Нысанбаев қатысып, ардагерлерді Ұлы Жеңістің 65 жылдығымен құттықтады. Ауыл шаруашылығы министр­лігінің Алматы қаласы бойынша аумақтық инспек­ция­сының бастығы Саламат Бектемісовтің ұйымдастырумен өткен жиында ардагерлерге бірінші, екінші және үшінші дәрежелі төс белгілер мен ақшалай сыйлықтар тап­сы­рыл­ды. Мұндай құрметке ие бол­ған­дар арасында бүгінде жас­тары тоқсаннан асқан, Ста­лин­град шайқасына қатысқан Василий Косенко, Станислав Головацкий, Владимир Бубнов сияқты соғыс ардагерлері және басқалар бар. Мәдікен Құспанов, Илия Нұров, Баян Жұмашев, сондай-ақ өзге де тыл еңбеккерлері осындай сыйлыққа ие болды. Жалпы саны қырықтан астам соғыс және тыл ардагерлерін құттықтау рәсімінен кейін, құрметті қонақтарға арналып “Жұлдыз” мейрамха­насында мерекелік дастарқан жайылды. Атақты әншілер асқақтата ән салып, бишілер мың бұралып би биледі. Бақыт БАЛҒАРИНА. АЛМАТЫ. ҰЛЫ ЖЕҢІСКЕ АРНАЛДЫ Экономикалық қылмысқа және сыбайлас жемқорлыққа қарсы күрес агенттігінің Қаржы полициясы академиясында Ұлы Отан соғысындағы Жеңіске 65 жыл толуына арналған “ХХІ ғасырда жастарды патриоттық тәрбиелеудің өзекті мәселелері” атты республикалық ғылыми-практикалық конференция болып өтті. Конференцияға аталған агент­тік пен академия қызмет­кер­лерімен қатар, Ұлы Отан соғысының ардагерлері, “Нұр Отан” ХДП және жергілікті атқару органдарының өкілдері, ғалымдар қатысты. Шараның ашылу салтанатында сөйлеген Эконо­ми­калық қылмысқа және сыбайлас жем­қор­лыққа қарсы күрес агенттігі төрағасының орын­басары С.Әшімбаев бұл же­ңіс аталарымыз бен ағалары­мыз­дың, апа­ла­рымыздың біздің қазіргі және болашақ өміріміз үшін Отан қорғаудағы жан беріп, жан алысып, аянбай күрескен ерлігі. Сол үшін де біз оларға бас иіп, құрмет көр­се­теміз. Осы орайда Экономикалық қылмысқа және сыбайлас жемқорлыққа қарсы күрес агенттігі Қаржы по­лициясы академиясына Ұлы Отан соғысының батыры, Халық қа­Һарманы Рақымжан Қош­қар­баев­тың есімін беру туралы жұ­мыстарды жүргізіп жатыр. Мұн­дағы негізгі мақсат сыбайлас жем­­қор­лыққа қарсы күрес жүр­гізетін жастарды оқытып шыға­ратын акаде­мия­ның беделін одан әрі асқақтатып, Отаны үшін, елі үшін, адалдық пен әділдік үшін күресетін нағыз қайсар да қайт­пас маман­дарды даярлау деді. Конференция жұмысына кел­гендер, ең алдымен, ака­де­мияның Құрмет аллея­сын­дағы Ұлы Отан соғысының ба­тырларына ар­налған ес­керт­кішке салтанатты түрде гүл шоқтарын қойып, со­ғыста қаза тапқан есіл ерлерді бір минөт үнсіздікпен еске алды. Онан соң академия тың­даушылары алаңда салтанатты шерумен жүріп өтіп, жекпе-жек күресі мен қоян-қолтық ұрыс тә­сілдерінің небір түрлерін көр­сет­ті. Ардагерлер мен қонақтардың назарына Ұлы Отан соғысын­да­ғы оқиғаларға қатысты жазылған тың көркем әдеби дүниелер мен тарихи құжаттар және сол кездің нақ өзін боямасыз бейнелейтін суреттер көрмесі ұсынылды. Конференция барысында оған қатысушылар Ұлы Отан соғы­сы­ның қасіреті мен нәтижелерін еске ала отырып, бүгінгі өскелең жастарды париоттық тәрбиелеу­дің өзекті мәселелерін талқыға салды. – Ұлы Отан соғысындағы Жеңіске 65 жыл толу қарсаңында өтіп жатқан бұл конференция біздерге аға ұрпақтың көр­сет­кен ерлігін ұмытпай, елімізге қызмет етуде бір кісідей бірлік пен татулықта болуға, қоғамымызға қауіп төндіретін жем­қор­лар­мен күрес жолын жетік оқып үйренуге, халыққа жан аямай еңбек ете білуге же­те­лей­ді, – дейді бізбен әңгімелескен ака­де­мия­ның екінші курс тыңдаушысы Нұрдәулет Өтебаев. Александр ТАСБОЛАТОВ.