Парламент • 30 Қыркүйек, 2021

Нығматулин Экология министріне ескерту жасады

Мәжіліс төрағасы Нұрлан Нығматулин жаңа Экология, геология және табиғи ресурстар министрі Серікқали Брекешевке ескерту жасады, деп жазады Egemen.kz.

Әсел САРҚЫТ

Мәжілістің жалпы отырысында Каспий теңізінің теңіз ортасын қорғау туралы заң жобасын талқылау кезінде депутат Жанарбек Әшімжанов министрге мемлекеттік тілде бірнеше сұрақ қойды.

«Біздің республикадағы қандай ұйымдар Каспий теңізінің биологиялық ресурстары бойынша зерттеу жүргізеді? Мұндай зерттеулерге қандай қаржы көздері пайдаланылады? Каспий теңізінің флорасы мен фаунасын зерттеу бойынша басқа Каспий мемлекеттерімен бірлескен жобалар мен бағдарламалар бар ма? Сауалға мемлекеттік тілде жауап беруіңізді өтінемін», деді депутат.

Министр Серікқали Брекешев сауалға орыс тілінде жауап беруге рұқсат сұрады.

«Сұрағыңызға рахмет. Мен мемлекеттік тілде жауап бере алмаймын. Қазақ тілін білмегендіктен емес, ойымды толық жеткізе алмаймын. Осыған байланысты, рұқсат етсеңіз, орыс тілінде жауап бергім келеді», деді ол

Мәжіліс Төрағасы Нұрлан Нығматулин бұл сұрақтың сәйкесінше мемлекеттік тілде қойылғанын және жауапты қазақ тілінде беру керек екенін атап өтті.

«Сіз бізге бірінші рет келдіңіз. Бірақ депутат өте орынды айтты. Ол мемлекеттік тілде сұрақ қойды, келесі жолы сұраққа мемлекеттік тілде жауап беріңіз. Сіз парламентке келдіңіз, сұрақ қазақ тілінде болды, сіз қазақ тілінде жауап беруіңіз керек. Иә, сіз шетелде оқыдыңыз, шет тілдерін білесіз, бірақ сіз министрсіз, сондықтан қазақ тілінде сөйлеуіңіз керек», деп баса айтты Мәжіліс төрағасы.

Күннің маңызды және өзекті жаңалықтарын «Егемен Қазақстан» телеграм каналынан оқыңыз