АУҒАНСТАН БОЙЫНША КОНСУЛЬТАЦИЯЛАР

Жыл сайынғы Қазақстан-АҚШ екі жақты консультациялары мен Қазақстан Республикасының Президенті Нұрсұлтан Назарбаевтың таяудағы сапары барысында қол жеткізілген уағдаластықтардың жалғасы ретінде СІМ-нің Ерекше тапсырмалар жөніндегі елшісі Өміртай Бітімов бастаған ауқымды Қазақстан делегациясы Ауғанстан бойынша консультациялар жүргізу үшін 26-28 сәуірде Вашингтонда болып қайтты, деп хабарлады ҚР-дың АҚШ-тағы елшілігі. Қазақстан делегациясының құрамына Қазақстан Республика­сы­ның Ауғанстандағы елшісі Ағы­бай Смағұлов, ҰҚК-нің Халық­ара­лық терроризм және діни экст­ре­мизм­мен күрес жөніндегі депар­таменті бастығының орынбасары Дәулетжан Құрамысов, Индустрия және жаңа технологиялар ми­нистр­лігі Халықаралық ынтымақтастық департаменті директорының орын­басары Олжас Раев және СІМ-нің ЕҚЫҰ департаментінің кеңесшісі Талғат Баймұхамбетов енді. Қазақстандық делегация Ауған­стан және Пәкстан бойынша Ар­нау­лы өкіл Ричард Холбрукпен, оның орынбасары Пол Джоунспен, Қорғаныс министрінің Ауғанстан, Пәкстан және Орталық Азия бой­ынша көмекшісінің орынбасары Дэвид Сиднимен және АҚШ-тың мемлекеттік агенттіктерінің өзге де өкілдерімен кездесулер өткізді. Келіссөздердің басты тақырыптары ауған тұрғындарын оқыту бойынша білім беру бағ­дар­ламаларын бірлесіп жүзеге асыру, адам ресурстарын дамыту, Ауған­станды қайта құру бойынша ынты­мақ­тастық, денсаулық сақтау, сауда қатынасын дамыту, бұл ел эко­но­микасына, оның ішінде кен өндіру өнеркәсібі, энергетика саласы мен ауыл шаруашылығына Қазақстан инвестициясын тарту болды. Тараптар Қазақстанның ЕҚЫҰ-ға төрағалығы аясында оның әлеуетін Ауғанстанда демократиялық мем­ле­кет құруға ықпал етуге пайдалану мәселесін жеке уәжде талқылады. Екі жақ сондай-ақ ауған тақыры­бын, атап айтқанда, оны ЕҚЫҰ Саммитінің күн тәртібіне енгізуді көздей отырып, одан әрі зерттеу туралы келісімге келді. Тұтастай алғанда, Қазақстан және АҚШ тарабы өткен кон­суль­тацияларды оң бағалап, Ауған­станда тұрақтылыққа жету және оның экономикасын қалпына кел­тіру ісінде екі жақты іс-қимылды жалғастыруға уағдаласты.