Кеше Қазақстан Республикасы Премьер-Министрінің орынбасары Гүлшара Әбдіқалықованың, Парламент депутаттарының, Президент Әкімшілігі, Үкімет өкілдерінің, орталық және жергілікті мемлекеттік органдардың, Мәдениет және ақпарат министрлігіне ведомстволық бағынысты ұйымдардың, қоғамдық ұйымдардың, БАҚ басшыларының қатысуымен Мәдениет және ақпарат министрлігінің кеңейтілген алқа отырысы өтті.
Мәдениет және ақпарат министрі Мұхтар Құл-Мұхаммед өз сөзінде министрліктің 2013 жылғы жұмысын қорытындылап, Мемлекет басшысының «Қазақстан жолы – 2050: бір мақсат, бір мүдде, бір болашақ» атты Жолдауын жүзеге асыруда сала алдында тұрған міндеттерге тоқталды. Баяндамашы қазақстандықтардың бәсекеге қабілетті мәдени ділін қалыптастыруға, заманауи мәдениет кластерлерін дамытуға бағытталған Қазақстан Республикасының мәдени саясатының ұзақмерзімді тұжырымдамасын әзірлеудің маңыздылығын мәдениеттің барлық саласы, шығармашылық қауымдастық бұл қадамды Елбасы ұсынған отандық мәдениет пен өнердің жаңа белестерге жетуінің, қазақстандық қоғамның бірегей шығармашылық әлеуетін жүзеге асырудың ерекше мүмкіндігі деп қабылдап отырғанын атап көрсетті. Тұжырымдаманың басты идеялық іргетасы Мемлекет басшысы өзінің Жолдауында айтқан Мәңгілік Ел идеясы болуы тиіс екендігі баса айтылды.
Саланың жай-күйі туралы әңгімелеген министр 20 жыл ішінде елде 2 мыңнан астам мәдениет нысандары ашылғанын тілге тиек етті. Соңғы он жыл ішінде театр, кино көрермендерінің, мұражайларға келушілердің, кітапхана оқырмандарының, концерттік бағдарламаларды тамашалаушылардың саны айтарлықтай артқан.
Мәдениет саласының проблемаларын шешудің басты жолдары 2030 жылға дейінгі әлеуметтік жаңғыртудың тұжырымдамасы мен жоспарының жобасына бөлек тарау болып енді. Мәдениет ұйымдарының типтік штаттары, мәдениет ұйымдарын дифференциялық субсидиялаудың жаңа ережелері бекітілді, 300 орынға арналған Мәдениет үйінің типтік жобасы әзірленді, мәдениет және мұрағаттық іс қызметкерлерінің азаматтық қызметкерлер ретіндегі еңбекақысын төлеудің жаңа моделі әдіснамалық тұрғыда әзірленді.
Министр Мемлекет басшысының 2015 жылғы 1 шілдеден бастап азаматтық қызметкерлердің жалақысын арттыру туралы тапсырмасының мәдениет және мұрағат ісі саласына толықтай қатысы бар екенін ерекше атап өтті.
Жаңа «Астана Опера» мемлекеттік опера және балет театры, Қазақ ұлттық мұражайы құрылды, тұңғыш Ұлттық көркемөнер галереясы құрылуда, «Казспорт», «Білім және мәдениет» жаңа телеарналары ашылды.
Алқа отырысында М.Әуезов атындағы Қазақ мемлекеттік академиялық драма театрының директоры Еркін Жуасбек, «Білім және мәдениет» телеарнасының директоры Бақыт Қайырбеков, Л.Н.Гумилев атындағы ЕҰУ-дің азаматтық-құқықтық пәндер кафедрасының профессоры, «Еуразиялық құқық қорғау орталығы» ҚҚ сарапшысы заң ғылымдарының докторы Еңлік Нұрғалиева, Алматы облысының Мәдениет, мұрағаттар және құжаттама басқармасының басшысы Рахмет Есдәулетов сөз сөйледі.
Алқа отырысын Қазақстан Республикасы Премьер-Министрінің орынбасары Гүлшара Әбдіқалықова қорытындылап, министрлікке бірқатар нақты тапсырмалар мен ұсынымдар берді.
«Егемен-ақпарат».
