КӨРПЕГЕ ҚАРАЙ КӨСІЛУ КЕРЕК

Үкімет басшысы стратегиялық жоспарлау мен бюджеттік бағдарламаларға қатысты қаржыны тиімді жұмсау қажеттігін ескертті Кешегі өткен Үкімет отыры­сын ашқан бетте Үкімет басшысы Кәрім Мәсімов тиісті мемлекеттік органдарға тапсырма берді. Премьер-Министр Мексика түбегінде “Бритиш Петролеум” компаниясының қал­қымалы қон­дыр­ғысының апатқа ұшырауына бай­ланысты үлкен қайғылы оқи­ғаның орын алғандығын, мұның өзі Америка Құрама Штаттары секілді ірі елге зардаптарын тигіз­гендігін, ал ол осы компанияның жұмысына қатысты көп сұрақтар туындататындығын айта келе Мұ­най және газ, Қоршаған ортаны қорғау министрлері Сауат Мың­баев пен Нұрғали Әшімовке жедел жұмыс тобын құрып, Каспийдегі мұнай өндіру жайына тексеру жүр­гізуді тапсырды. “Осы комиссия­ны құруға байланысты ұсынысты бүгін кешке дейін әзірлеп, маған баяндаңдар” деді. Сонымен қатар Премьер-Ми­нистр өзінің бірінші орынбасары Өмірзақ Шөкеевке азық-тү­лік ба­ға­ларының өсуіне жол бермеу мә­се­леле­рі­мен айналысатын жұ­мыс тобын жедел құруды тап­­сыр­ды. “Өкінішке орай, жекелеген өнім­дер ба­ғаларының өсуге қарай бет алған­дығы бай­қа­лып отыр. Сон­дық­тан Эко­номи­калық даму және сауда, Ауыл шаруашылығы ми­нис­тр­лігін тарта отырып, осы мәсе­лені тез арада талқылаңыздар. Келесі сейсенбіде осы мәселеге арнап бірлескен отырыс өткізетін боламыз” деді Үкімет басшысы. Премьер-Министрдің тапсыр­ма­лары Бәсе­келестікті қорғау агенттігінің басшысы Мәжит Есен­баевқа да қатысты болды. Халық жедел сезінетін азық-түлік, жанар-жағармай бағалары бақы­лау­да ұсталуы қажеттігі баса ай­тылды. Мұнан кейін Үкімет отыры­сын­да қаралған стратегиялық жос­парлау, бюджеттік бағдарла­ма­­лар­ды орындау мәселесіне қатысты Пре­мьер-Министр Кеңсесінің басшысы Ғабидолла Әбдірах­ма­нов­тың, Экономикалық даму және сауда министрі Жанар Айтжа­нова­ның баян­да­малары тыңдалды. Ға­бидолла Әбдірахманов өз сөзінде мемлекеттік орталық және жергі­лікті органдардың стратегиялық жоспарлар мен бюд­жеттік бағдар­ламаларды орындау бары­сын­да кейбір қайшылықтарға жол бер­гендігін, бұл мәселелерде ортақ бір түсініктің қалыптаспай келе жат­қандағын атап көрсетсе, Жанар Айт­жанова стратегиялық жоспар­лау қағидаттарын енгізу мемлекет­тік органдардың жұмысында нақ­­ты нәтижелерге қол жеткізуге мүм­кіндік беретіндігіне тоқталды. Атал­ған мәселеде белгілі бір нә­ти­желерге жету үшін, біріншіден, стратегиялық, экономикалық және бюджетті жоспарлаудың өзара бай­ланысын қамтамасыз ету, екін­ші­ден, мемлекеттік органдардың қыз­метін стратегиялық мақсат­тар­ға қарай бағыттау, үшіншіден, мем­лекеттік органдар қызметіне тиісті бағалау өлшемдерін енгізу қажет. Үкімет басшысы Кәрім Мәсі­мов аталған мәселені қорытын­ды­лай келе бірқатар тапсыр­ма­лар берді. Премьер-Министр бюджет­тік үде­ріс­тің тұрақтылығы бірінші орында тұру ке­ректігін баса айтты. “Біз қазір дағдарыстан шы­ғып ке­леміз, Мемлекет басшысы белгілеп бер­ген бағытқа сәйкес ілгері жыл­жу үстіндеміз, мұн­дай кезде бюд­жеттік үдерістің тұрақтылы­ғы­ның маңызы өте зор” дей келе еліміздің қазынасының кірісі қаншалықты болса, шы­ғы­ны да соншалықты болуы қажеттігін ескертті. Бұған әрбір министрлік пен ведомство өздеріне тапсырылған қызметті дұрыс ұйымдастыра алғанда ғана қол жеткізе алатындығын айтты. Премьер-Министр күн тәр­тібіне қойылып отырған мәселеге қатысты басқа да бірқатар тап­сыр­малар берді. Сұңғат ӘЛІПБАЙ.