Тараптар Қазақстанның мұнай-газ химиясы өнеркәсібінде ірі инвестициялық жобаларды – полипропилен және полиэтилен өндірісін бірлесіп іске асыру мәселелерін талқылады.
Атырау қаласындағы интеграцияланған газ-химия кешенінің базасында 2022 жылдың басында қуаты жылына 500 мың тонна полипропилен өндіретін бірлескен кәсіпорын ашу жоспарланған.
Алдағы уақытта қуаты жылына 1,25 млн тонна полиэтилен өндіретін зауыт құрылысының бірлескен жобасы іске асырылатын болады.
«Аталған жобалар бойынша ынтымақтастықтың базалық шарттары аясындағы келісімге KAZENERGY XIV Еуразиялық форумы шеңберінде СИБУР, «Самұрық-Қазына» АҚ және «ҚазМұнайГаз» ҰК» АҚ арасында қол қойылды», деп хабарлайды Үкімет басшысының ресми сайты.
А. Мамин мен Д. Конов Қарашығанақ кен орнында бірлескен мұнай-газ химиясы жобаларын іске асыру, СИБУР кәсіпорындарында қазақстандық мамандарды даярлау перспективасын және өзара іс-қимылдың басқа да мәселелерін талқылады.
Айта кетейік, СИБУР – штатында 18 мыңнан астам адам жұмыс істейтін, Шығыс Еуропадағы ең ірі мұнай-газ химиясы холдингі. Жылына 2,5 млн тонна базалық полимер шығаратын ЗапСибНефтехим мұнай-химия кешені құрылысының жобасын жүзеге асырды. Sinopec-пен бірге қуаты жылына 2,7 млн тонна полиэтилен мен полипропиленді құрайтын Амур газ химиясы кешенінің құрылысын жүргізіп жатыр.
Кездесуге энергетика министрі Мағзұм Мырзағалиев, «Самұрық-Қазына» АҚ басқарма төрағасы Алмасадам Сәтқалиев, «ҚазМұнайГаз» ҰК» АҚ басқарма төрағасы Алик Айдарбаев және т. б. қатысты.
