Осыдан бір ай бұрын Боснияның Зеница қаласындағы екі құраманың алғашқы ойынында Талғат Байсуфиновтің шәкірттері жақсы матч өткізіп, азулы қарсыласпен сырт алаңда 2:2 есебімен тең түскен еді. Сондықтан өз алаңымызда өтетін ойынның жауапкершілігі мен маңыздылығы футболшылар үшін де, жанкүйерлер үшін де өте жоғары болатын. Өйткені өзімізге және өзгелерге Қазақстан құрамасының көрсетіп жүрген бұған дейінгі тәуір нәтижелері (Украинамен – екі рет, Босния және Герцеговинамен бір рет тең ойын) кездейсоқ емес екендігін дәлелдеуге жақсы мүмкіндік еді. Өкінішке қарай, нәтиже жанкүйерлер күткендей болмады. Сырт алаңда терезесі тең түскен құрамадан қалайша өз еліңде, өз жанкүйерлеріңнің қолдауымен өткен ойында жеңіліп қалуға болады?
Оның үстіне қарсыластар Қазақстанға өздері қалағандай оңтайлы құраммен келе алмады. Миралем Пьянич және тағы төрт футболшы жарақатына байланысты кешегі ойынға қатыса алмаса, тағы алты ойыншы виза мәселесі бойынша ұлттық құрамасына көмектесе алмады. Осылайша, Босния құрамасы 11 футболшысын елге қалдырып кетуге мәжбүр болса да, сырт алаңда еш қиындықсыз жеңіске жетті. Міне, бұл – өткеннен сабақ алып, қателікпен жұмыс істеудің жарқын нәтижесі!
«Астана Аренада» өткен ойынды жерлестеріміз өте белсенді бастады. Төрешінің ысқырығы естілген сәттен бастап Бақтиер Зайнутдинов бастаған жігіттер алға қарай ұмтылды. Екі қаптал арқылы кезек-кезек шабуыл ұйымдастырып, қарсылас құраманың қорғаушыларын сақ ойнауға мәжбүрледі. Дегенмен жасанды алаңға бой үйреткен босниялықтар 10-минуттан басымдықты өз қолдарына ала бастады. Нәтижесінде, матчтың 25-минутында Мирослав Стевановичтің оң қапталдан асырған пасын Смаил Превляк баспен қақпаға дәл бағыттап, есеп ашты. Бұл сәтте Юрий Логвиненко шабуылшыны қорғап тұрғанымен, Превляктің алдында дәрменсіздік танытты. Осы арада қақпашымыздың да қателік жібергенін айта кету керек. Бірінші тайм 1:0 есебімен қонақтардың басымдығымен аяқталды.
Қазақстан құрамасының футболшылары екінші таймды да өте ширақ бастады. Жерлестеріміз бірінші таймдағыдай екі қаптал арқылы шабуыл ұйымдастырып, қақпа кілтін табуға тырысқан еді. Бірақ босниялық тәжірибелі қорғаушылар гол соғуға мүмкіндік бермеді. Ал кездесудің 66-минутында Смаил Превляк қақпашымен бетпе-бет қалып, дубльдің авторы атанды – 2:0. Матчтың соңғы минуттарындағы стандарт жағдайында Бақтиер Зайнутдинов жұбаныш голын соғып, есеп айырмасын қысқартқан еді. Алайда Италиядан келген бас төреші қақпашыға қарсы ойын тәртібі бұзылды деп, бұл голды есепке алмады.
Матчтан кейін Қазақстан құрамасының бас бапкері Талғат Байсуфинов ойын туралы өз пікірін білдірді. «Негізі ойынды жақсы бастадық. Бірақ екі қателік жіберіп, қақпамызға екі гол өткізіп алдық. Үзіліс кезінде футболшылардан «Неге қорқасыңдар?» деп сұрадым. Бірақ бұл туралы кейінірек сөйлесейік. Қазірше біз бірінші нөмірмен ойнауға дайын емеспіз. Бұл функционалды жаттығуларға байланысты емес. Менің ойымша, бұл психология мен менталитетке тікелей қатысты. Біздің басымызда қарсылас бірінші нөмірмен ойнауға мүмкіндік бермейді деген ой қалыптасып қалған. Жігіттермен сөйлесіп, осы жағдайды талқылау керек», деді Талғат Байсуфинов.
Енді Қазақстан ұлттық құрамасы келесі ойынын ертең тағы «Астана Аренада» Финляндия құрамасымен өткізеді.
