Baspana market-тің көмегімен қазақстандықтар нысанның толық сипаттамасын, қолжетімді пәтерлер санын, құны мен бөлмелердің орналасу жобасын егжей-тегжейлі анықтап көре алады. Жаңа цифрлы платформада лайықты мүлікті тапқаннан кейін, оны сол жерде брондап, жеке кабинетте сатып алу барысын бақылауға болады.
Егер қолданушы жаңа үй алуды көздесе, платформа арқылы құрылыс салушыдан кеңес алу үшін онлайн-өтінім жолдай алады. Ал таңдағаны екінші нарықтағы баспана болса, аталған мүлікті Отбасы банкінен несие алу үшін кепілзат ретінде ұсынуға қаншалықты жарамды екенін бірден көруге мүмкіндік бар.
Сондай-ақ Baspana market құрылыс салушылар үшін Отбасы банкімен өзара қарым-қатынас орнатуға ыңғайлы цифрлы алаңға айналмақ. Бұл жерде қажетті құжаттарды тіркеп, банкпен ынтымақтастық жөнінде электронды өтінім жолдап, «Отбасы банкінің» кең аудиториясына құрылыс салушылар өз пәтерлерін сатуға шығара алады.
– Қазіргі уақытта банкте баспана алу үшін қаражат жинақтап отырған 2 млн-нан астам салымшы бар. Олардың барлығы жылжымайтын мүлік нарығындағы әлеуетті сатып алушылар. Салымшыларға ыңғайлы болу үшін әрі уақыттарын үнемдеу үшін біз үйді бір жерден таңдап, тіпті онлайн ипотека рәсімдеуге мүмкіндік беретін маркетплейсті іске қостық. Бұл цифрлы қызмет пен қарапайым адамгершіліктің ұштасуы. Біз Baspana market-тегі онлайн ипотеканың көмегімен 10 мыңға жуық несие беруді жоспарлап отырмыз, – дейді Отбасы банк АҚ басқарма төрағасы Ләззат Ибрагимова.
Онлайн ипотека – сынақ режімінде жұмыс істеп тұрған қанатқақты жоба. Ол коммерциялық нарықтан жаңа немесе қолданыста болған тұрғын үй сатып алғысы келетін банк клиенттеріне қол жетімді болады. Қазір дәл осындай несие түрін рәсімдеу үшін банк бөлімшесіне 9 рет бару қажет. Онлайн ипотека ашылса, банкке екі рет қана келуге болады.
Қызметтің жаңа түрін Baspana market-те орналасқан жеке кабинет арқылы пайдалануға болады. Ол жерде әлеуетті қарыз алушы сатып алу-сату келісімі аяқталғанға дейін өзіне жеке тағайындалатын бейнекеңесшімен байланыса алады. Кеңесші алдын ала есеп жүргізіп, құжаттар тізімін айтып, несие сомасының алдын ала мақұлданған көлемі жөнінде ақпарат бере алады. Әрі қарай, клиент өзіне ұнамды баспана тауып, оны бағалатады. Мүлікті бағалау құжаттары дайын болған кезде, бейнебайланыс операторы несиелік өтінімді толтыруға көмектесіп, клиентке оның жағдайы туралы хабарлайды. Егер банк оң шешім шығарса, оператор сатып алу-сату келісімін рәсімдеу үшін нотариусқа баратын ыңғайлы уақытты брондауға көмектеседі.
Осы процестен кейін ғана болашақ қарыз алушы құқық белгілейтін құжаттарды ұсыну үшін алдымен банк филиалына, кейін несиелік келісім мен оны өтеу кестесіне қол қою үшін банк бөлімшесіне барады.
